【Now財經台】美國加息步伐放慢，除咗金融市場開心，靠低借貸成本借錢吊命嘅「殭屍企業」都鬆一口氣。
呢啲「殭屍企業」(zombie firms)嘅主業EBIT(息稅前利潤)連續3年都低過需要支付嘅利息。換言之，係有現金流，但資金僅足以還貸款利息嘅負債公司。據《彭博》報道，截至今年5月底止，羅素3000指數中有逾600家企業係殭屍企業，當中有唔少大企業，包括近日翻生嘅網紅股AMC院線、美國航空。
馬山資本董事總經理林子傑指，2008年金融海嘯後，各國央行為救市推出無限量化寬鬆營造極低息環境，間接養住呢啲殭屍企業，但佢認為有啲殭屍企業可能捱唔過今個加息周期。
佢又話，呢啲企業集中喺舊經濟板塊，如工業、零售、能源、物流等企業，過去兩年疫情令經濟出現結構性轉變，呢啲公司嘅商業模式已經唔及以前咁有利可圖，加上美國經濟仲未走出衰退陰霾，呢啲殭屍企業面臨借貸成本因加息而大增，可能已命不久矣。
