亞洲小姐冠亞季軍出爐 網民：有陣麻辣味

《亞洲小姐競選2018－香港區決賽》喺15年因欠缺資金而停辦，等到今年亞視復台，連最具代表性嘅節目之一嘅「亞姐」都一樣復辦。早前仲宣布同奇妙電視合作，兩台分別喺10月7日晚（即噚日）一齊播放《亞洲小姐》，唔知大家噚晚有冇收睇呢？

噚晚喺大埔總台舉行《亞洲小姐競選2018－香港區決賽》，由陳志雲、梁珮瑚、陳嘉容、顧紀筠和陳欣健擔任評判，前港姐亞軍朱慧敏擔任司儀。經過六個環節後，冠亞季及最上鏡小姐正式誕生。冠軍由表現平平嘅2號梁雪瑤（Sheryl）爆冷奪得，所有人聽到賽果都愕然；而亞軍得主4號張右雨（Gloria）；季軍由10號林孜沫（Momo）奪得。至於9號李芷菱就獲頒「IG人氣大獎」和「最上鏡小姐」獎項。

一班網民對今屆亞姐都有唔同意見，有網民話：「睇落似選公屋之花多ｄ，亞洲依然keep得住以往風格，好野！」、「其實季軍都唔差呀，有少少陳法拉feel」、「亞姐離不開亞視俗味」、「我到底睇緊乜野」、「工展小姐仲靚啦」、「行出嚟已經有陣麻辣味。」當然亦有網民將亞姐同港姐比較，「亞姐啲衫正常過港姐好多。」、「本來唔覺港姐靚。有比較下特別靚喎。」、「好過雷莊兜」、「本來唔覺港姐靚。。有比較下特別靚喎。」

獲獎呢4位佳麗將會遠赴韓國接受培訓，之後仲會代表香港區前往海外地區參賽（例如馬六甲及大中華地區），同其他地區佳麗一齊競逐最高殊榮。