亞洲小姐2020被指製作錯漏百出 佳麗hea跳／音效出事／扮有廣告？

永恆嘅亞視喺噚晚舉行《2020亞洲小姐香港區決賽》，疫情下亞視都成功邀請到400位嘉賓到場直擊，而觀眾亦都可以睇現場直播感受氣氛，最終由10號蔡小蝶、5號何雙妍及8號高文君分別奪得冠亞季軍。Facebook專頁「Toxictv HK 毒TV」都有詳細咁介紹成個亞姐節目，仲讚亞姐係今年最精彩嘅電視台製作沒有之一！

「Toxictv HK 毒TV」分咗幾點去分析製作，首先係製作上錯漏百出，全晚無論嘉賓定佳麗啲音效都出晒事。中間冇廣告又扮到有咁，主持無端端話一陣再見，之後個畫面黑咗十幾秒後就繼續播。節目仲有幾次唔知咩原因要不停拖，主持唯有問台下啲評判意見，每人講足十秒先可以交返上台。

節目首先有佳麗們大跳K-Pop舞蹈，不過佢哋跳得極度唔齊，有位佳麗仲hea跳同唔記得舞步。戲肉當然係佳麗們輪流才藝表演啦！佢哋個嗰都係唱歌跳舞，不過唔少佳麗唱到走晒音， 當中有幾個特別突出，例如蔡小蝶用小朋友聲自彈自唱《小手拉大手》，唱到好似兒歌咁、馮熙淳唱急口令版《I Hate You， I Love You》、仲有張凱琳自彈自唱兼離奇做一字馬，成功將歡樂帶俾香港人。