聲明先：圖中為真實截圖（取自２０１６年大年初一，並非開市時段），圖為一通部份交易版面（利申：因為我冇其他券商戶口，並非替一通宣傳，其他券商顯示方式都係大同小異）

－－－－－－－－－－－－－－－－－－－－－－－－－－－－－

首先望下張圖，就如我第一篇所講咁，每張期貨都有４個必要原素：

１）指定商品；

２）指定價格；

３）指定結算日期；

４）指定數量呢張圖既例子（黑線間底）

１）商品：港交所股票（股票編號 388)

２）價格：不定（要視乎你咩價成交，好似股票咁，下面講）

３）日期：２月２６日（即係到期日，果日亦都叫做期結日）

４）數量：１００股（圖中寫做合約倍數）

價格方面要我地暫時當圖中既收市價係你真實成交左既價（即係＄１６７．０６）

係呢到睇，期貨同股票其實都極為相似，而利潤／損失既計算方法其實同股票都係一樣，不過為左令未買過股票既朋友都睇得明，所以某Ｄ地方我會以簡單到未買過股票既同學仔都明白既角度去寫，識既同學仔可以飛左佢。

－－－－－－－－－－－－－－－－－－－－－－－－－－－－－

（股票新手看）利潤／損失既計算方法＝「賣出價－買入價」＊股數

如果你係按「買入」即係睇好，而成交係＄１６７．０６既話，當２月２６日收市既時候，假設港交所

升上＄１７５，咁你呢張期貨總共就可以賺到（＄１７５－＄１６７．０６）＊１００股＝＄７９４

相反如果佢期結日時係跌至＄１６０，呢張期貨總共就會蝕（＄１６０－＄１６７．０６）＊１００股＝＄－７０６

如果你係按「賣出」即係睇跌，而成交係＄１６７．０６既話，當２月２６日收市既時候，假設港交所升上＄１７５，咁你呢張期貨總共就會蝕（＄１６７．０６－＄１７５）＊１００股＝－＄７９４

相反如果佢期結日時係跌至＄１６０，呢張期貨總共就會賺（＄１６７．０６－＄１６０）＊１００股＝＄７０６

（Ｐ．Ｓ．以上計算無計入佣金等交易收費）

－－－－－－－－－－－－－－－－－－－－－－－－－－－－－

沽空

有Ｄ買開股票既人會唔係好明，明明自己無貨係手，點解都可以按「賣出」？無錯，無貨係手按賣出呢個動作就叫沽空。其實同你買上係同一道理，你買入之後都係等機會賣返出去，而沽空都係賣出左之後等機會買返入黎，就係咁簡單，而身為散戶既你就可以用呢個方法買個市跌，唔使以後剩係買股票向上。有人會問沽空使唔使比利息？唔使，就同你買上一樣都係唔使利息。期貨要比既係按金。

－－－－－－－－－－－－－－－－－－－－－－－－－－－－－

按金　及　槓桿效果

再望一望返張圖，合約倍數下面寫住按金，就係買一張呢隻股既期貨需要既按金，呢到個例子係＄１６４０。

港交所現貨市場收市時係＄１６７（看圖中最底現貨價），佢正股一手１００股，即係買一手正股要＄１６７００。但如果你買一手期貨只係要＄１６４０按金，即係大約只需正股１０％既價錢你就買到一手，呢個情況我地計佢槓桿倍數就係＄１６７００／＄１６４０＝～１０倍槓桿

再出第二個例子，５號仔匯豐銀行（呢個例子唔貼圖了），上日收市價＄５２．３５，佢正股一手４００股，買一手正股即係需要＄２０９４０。但佢一手期貨按金只需＄１７３０，即係＄１７３０／＄２０９４０＝８．２％。只需正股既８．２％價格就買到一手；槓桿倍數＝＄２０９４０／＄１７３０＝大約１２倍槓桿。

槓桿既意思，即係你用同一份量既錢，你買正股只可以買到一份，但買期貨就買到槓桿倍數咁多份。

即係你拎住一萬七千蚊，你只可以買一手港交所正股，但如果買期貨你就買到十手。

如果港交所升＄１，你用萬七蚊買一手正股只會賺到＄１＊１００股＊１手＝＄１００；

但如果你用用萬七蚊買十手期貨你就會賺到＄１＊１００股＊１０手＝＄１０００；

不過，有得咁賺就有得咁蝕！蝕一樣可以以倍數計！視乎你拎住呢筆錢買幾多手期貨。

－－－－－－－－－－－－－－－－－－－－－－－－－－－－－

切勿濫用槓桿　勿以為槓桿是惡魔

唔少人係想以少博大，期貨的確係可以做到呢樣野。例如如果你睇好港交所但係得＄２０００本金，你想買一手價值萬七蚊既港交所股票你係唔會夠錢。但如果你係買一手港交所期貨就夠錢了。

用＄１６４０就買到，仲有＄３６０剩。

假設港交所升＄１０，買正股既就賺＄１０＊１００＝＄１０００，利潤百份比係＄１０００／＄１６７００＝～６％

買期貨既都係賺＄１０＊１００＝＄１０００，如果計到盡既話，本金只係用左按金＄１６４０，所以利潤百份比係＄１０００／＄１６４０＝～６１％

不過，如果港交所跌左＄５，帳面即係輸＄５００，按金就會跌至＄１１４０，即係低過７０％按金，証券行就會要求你限時內入返足夠既錢落戶口令按金上返７０－８０％以上（俗稱叫你補倉），否則就會幫你強制平倉（斬倉，即時幫你止蝕）。

但係，上面呢個例子本身係有＄２０００本金係個証券商戶口入面，買完期貨扣左＄１６４０按金仲有＄３６０剩，所以當港交所跌左＄５，按金得返＄１１４０，但果＄３６０會自己走入去按金入面，變成按金剩餘＄１５００。＄１５００／＄１６４０＊１００％＝９１。４％；按金仲係９成以上，所以唔會比人 CALL MARGIN。但如果港交所再跌多＄４，即係總共比你買入價跌左＄９，按金就會得返＄１５００－＄４＊１００＝＄１１００。１１００／１６４０＊１００％=６７％；咁就低過７成，又比人CALL MARGIN叫你補倉，唔補就會幫你斬倉了。

如果你被人斬左倉，佢幫你斬倉個價同上面講既一樣係跌左＄９（平倉價即係＄１６７。０６—９＝１５８。０６）既話，你蝕既錢就係＄９＊１００股＝＄９００。虧損百份比：＄９００／＄２０００＝—４５％。差唔多係無左一半既投資額，風險好似好大，不過呢到輸既錢其實同買一手正股跌＄９輸既錢係一樣都係＄９００（虧損百份比：＄９００／＄１６７０００＝－５。３％），只係百份比唔同。只要你買期貨既時候，唔好將自己既本金用得咁盡買咁多張Hold晒做按金其實就會好好多, 甚至善用期貨槓桿效果可以得到額外收入。我下面呢到講個例子:

我戶口有$20000, 我睇好港交所我想買佢升, 但港交所一手正股要$16700, 如果買左佢既話我戶口得返$3300基本上其他穩陣野都買唔到。我既收入來源完全只可以係靠港交所既升幅同利息。

但如果我買港交所期貨既話，我只係需要$1640按金，扣除呢$1640之後個戶剩餘$18360。自己心中再將戶口入面其中$8000鎖起唔用，當係比港交所下跌用既按金緩衝（計埋按金既話，$8000+$1640可以夠比港交所跌大約$85; 即係隻股跌50% ($85/$167=~50%)先比人斬)，咁樣既持有方法其實已經相當穩陣好低機會比人斬。

然後我地可以用剩低果$18360-$8000=$10360, 其中既$10000黎抽IBOND，每年利息不定但而家大約有$400一年。

如果萬一港文所真係大跌勁多，跌左＄８５得返＄８２，而你又唔想放走佢既話，你可以放左IBOND，套左果１萬蚊出黎同埋食左果Ｄ利息放係戶口入面做按金緩衝。

賣左IBOND拎返1萬, 再加上利息假設有$50，咁你個戶口呢個時候就最少有＄１００５０。

由於你既戶口有既銀碼大於一手正股既價（跌到＄８５時，一手只需＄８５００），所以即使港交所跌９９。９９％，跌到剩低＄０。０１都好，你個戶口都仲係有錢剩，係唔會比人CALL MARGIN， 唔會比人斬倉，持有既效果其實就同ＨＯＬＤ正股係一樣，不過你中間就食多左一浸IBOND既利息 (P.S. 未扣除交易費用)。

以上既例子係其中一個善用期貨，達至資金發揮較大效果既一個例子，想睇更多例子既話我將來再講。我地將重點放返係期貨到先。

(題外話：其實我唔建議跌既時候都仲死HOLD一隻股票，每一次投資都應該設下止蝕，上面個例子隻港交所跌左一半都唔止蝕好多時都係Ｄ人死抱唔認輸／買賣前無計劃／假希望造成，希望同學唔好犯下呢Ｄ錯）

－－－－－－－－－－－－－－－－－－－－－－－－－－－－

安全槓桿倍數

我唔會點教大家用咩方法賺錢，不過會同大家講點樣無咁易遇上死亡事件。

過度槓桿係一種好多人既死因。

如果你咁岩有一手正股價值既現金，我建議最多都係買２－３手果隻股既期貨好喇。拎住一手正股價值現金去買兩手期貨既話，槓桿倍數係２。至於止蝕位就要因應你自己系統。

槓桿倍數計算方法

如果我拎住$16700, 買1手期貨, 即係每手期貨平均用$16700做BACK UP

$16700(一手正股價錢) / $16700 (Back up資金) =1, 一倍槓桿即係無槓桿, 隻股要跌100%你先會破產

如果我拎住$16700, 買兩手期貨, 即係每手期貨平均用$8350做BACK UP

$16700(一手正股價錢) / $8350 (Back up資金) =2, 即係兩倍槓桿, 隻股跌50%你會破產

如果我拎住$10000, 買兩手期貨, 即係每手期貨平均用$5000做BACK UP

$16700(一手正股價錢) / $5000 (Back up資金) =3.34, 即係3.34倍槓桿, 隻股跌30%你就會破產

如果我拎住$10000, 買4手期貨, 即係每手期貨平均用$2500做BACK UP

$16700(一手正股價錢) / $2500 (Back up資金) =6.68倍槓桿, 隻股chok起上黎, 可能一兩日跌15%你就會破產

每人都有自己既炒法，可能你既炒法係要高槓桿去炒。但我見好多失敗既例子其中之一就係過度槓桿，你要記住在心中。無論你以前贏過幾多次１００％既增長都好，可能１０００次，１萬次都好，只要有１次跌１００％，只需一次，就已經GAME OVER。再提一次，炒槓桿系列既野，更加一定要有止蝕！

－－－－－－－－－－－－－－－－－－－－－－－－－－－－

不同月份的期貨

我地而家再睇一睇返張圖，可以見到圖中上方用紅色圈圈住既，寫住２，３，４，６，９。

呢ｄ數字係寫住期貨合約既到期月份，分別係二月，三月，四月，六月，九月。

點解冇左五月，七月，八月呢？

是咁的

期貨月份係以本月（二月），下月（三月），後月（四月），本季（三月），下季（六月），後季（九月）做到日期。

(p.s. 期指有少少唔同, 冇左「後月」呢個月)

唔同月份既期貨合約本質上其實係差唔多(本質上)，只不過通常越近日子既期貨，佢既流通量會越高，流通量越高通常代表住買價同賣價差距越少。

－－－－－－－－－－－－－－－－－－－－－－－－－－－－

（股票新手看）買價賣價

睇下張圖既中右方，有兩棟野，左邊「買價選單」第一行寫住166.00, 而166.00既左邊寫住個1字

呢個意思即係而家有人係市場上叫緊「我願意以$166買入一手」,

下面165.00既左邊都係寫住個1字，同樣，即係而家有人係市場上叫緊「我願意以$165買入一手」

由於$166高過$165, 所以$166果個係排得高d, 優先可以買到貨

再下面果行$162.81既左邊寫住個2字，即係而家有人係市場上叫緊「我願意以$162.81買入兩手」或者有「兩個人」同時叫緊「我願意以$162.81買入一手」

如果呢個時候（假設係開緊市），有人話「我要以市價即時賣出一手港交所」既話，咁呢個人就會以$166(買價排第一果個價) 即時賣出佢果一手股票。

右邊果行「賣價選單」第一行寫住169.00, 右面寫住1字, 即係話有1個人「我願意以$169賣出一手」

如果呢個時候有人話「我要以市價即時買入一手港交所」既話，咁呢個人就會以$169(賣價排第一果個價) 即時買入佢果一手股票。

不過如果果個人按「買入」後，佢填既價係「$167.00」一手既話，就暫時成交唔到，因為冇人$167賣，

咁佢呢個「買盤」就會排左係「166.00」上面，而166.00既左邊會寫住個1字, 代表有1手在叫價。

直至有人願意用市價黎賣咁先會成交。

－－－－－－－－－－－－－－－－－－－－－－－－－－－－

不同月份期貨　價值會有分別

如果你有Click下港交所２月期貨同９月期貨，你應該會發現９月個價係比２月平左幾蚊。點解呢？

主要既原因係因為正股係會有利息派，而期貨係唔會有利息派。

如果清楚派息同除淨既話你應該立即就會明白，唔明白既跌去下面到睇一睇先。

所以遠期期貨會低價Ｄ既原因，就係因為期貨冇利息派，佢預先將利息減去，就變成遠期期貨個價。

而港交所根據以往既記錄，一般係２月尾同８月中派息，所以會見到９月個價係低幾蚊。

（股票新手看）派息

派息既意思，即係間公司會比Ｄ利息比股東，但係你有冇諗過Ｄ錢係來自邊到？

來自盈利？可能正確，但都可以唔係。可能只係來自佢賣左Ｄ野，現金多左之類，唔知Ｄ錢擺邊，就派比股東。總之，佢派既利息來源，係來自間公司既資產。

所以當佢派息既時候，資產下跌，股價就會下跌。具體情況：

當一隻股票到左派息時期既話，會先經歷一日叫除淨日。例如我地睇返388港交所，佢上一次派息既除淨日係2015年8月25日，每股派息$3.08HKD。而係8月24日收市佢係$178左右，當一去到25號時, 由於呢日係除淨日，個股價就會即時減去派息果$3.08, 變成大約$175。簡單D講, 只係將你既錢抽部份出黎比返你。但點解要有派息呢個動作？因為大家通常會預期隻股會慢慢上返去派息前個價。

－－－－－－－－－－－－－－－－－－－－－－－－－－－－

流通量問題

上面提過，越遠期既期貨，通常流通量就越低，流通量最差既情況，就係冇人開價。

香港既期貨係有莊家制度，港交所係鼓勵莊家當有人問價時去報返個價比人。（佢地肯報價港交所係有獎勵比佢地的）

如果係一ｄ大型，成交量高既股票，通常呢Ｄ股票既即月期貨都唔會冇人炒，例如700, 5號仔呢d，你想買賣通常都搵到對手。但有好多股票既期貨係根本無咩人買賣，呢ｄ股票你想搵對手既話通常要出ｄ好cheap既價先有人肯接，所以呢ｄ股票既期貨好難玩，都唔建議新手玩呢ｄ。

不過就算700, 5仔呢d，當一預上股災等特殊情況，都會冇人開價，大家都唔敢講個價出黎，一係一講就相差幾個％甚至十幾個％咁遠。大家要留意返呢個風險既問題。

－－－－－－－－－－－－－－－－－－－－－－－－－－－－

香港最大流通量的期貨－－期指

講左咁耐，終於可以講期指，當你明白晒上面期貨既道理，要理解期指就超易。

期指既全名係恆生指數期貨

即係買賣恆生指數，但係以期貨型式

恆生指數唔係一件實物，同上面股票有Ｄ唔同，但係恆指同股票同樣黎講佢地都係有一個價值，大家就係買賣呢個價值既上落。（新手看下面，講解咩叫恆生指數）

（股票新手看）

恆指英文係Hang Sang Index (簡稱HSI), 期指係Hang Sang Index Future(簡稱HSF)

恆指係由恒生銀行屬下恒生指數有限公司負責計算，呢個指數係由五十隻恆指成份股既股價計出黎，即係話呢５０隻股當佢地一齊升既時候，恆指都會一齊升，佢地一齊跌既話恆指就一定係跌。

５０隻股通常都係有Ｄ上有Ｄ落，而每隻股票佔恆指既比重又有Ｄ唔同，所以５０隻股票拉上拉落加加埋埋就會造成左每日恆生指數既升跌，如果你想睇果５０隻股有咩既話你可以去以下其中一個網址

－－－－－－－－－－－－－－－－－－－－－－－－－－－－

期指類別

期指分兩種，一種叫大期HSI，一種叫細期ＭＨＩ。

大期價值每點值＄５０，每張按金大約＄７４０００；細期每點價值＄１０，每張按金大約＄１５０００

咩叫做每點＄５０，每點＄１０呢？下面舉個假設既例子：現在１０：００正，２月份期指報１９０００點，根據你自己既系統，佢指出期指黎緊會跌既，於是你就買左一張MHI Short(即係沽細期-1)，系統指出止蝕位要Ｓｅｔ係１９３００，止賺位Ｓｅｔ係１８７００。

下午３：００時，期指跌到１８７００，到左止賺價，呢個時候你買返一張Long(+1)做平倉。

你係睇跌，所以即係賺３００點，而ＭＨＩ每點價值係＄１０，＊３００點即係賺到＄３０００。

另一個例子

現在１５：３０，期指現報１８５００，根據你自己既系統，佢指出期指黎緊會升，但今次你買大期。

系統指出止賺１８８００，止蝕１８２００。但係去到收市時刻都仲未到止賺或者止蝕位。

然後就下一日開市了。

一開市期指第一口價就裂口低開５００點，報１８０００。由於低過止蝕位１８２００，所以就立即沽返一張大期做平倉止蝕，輸５００點。

因為係大期，每點＄５０，所以就５００點＊＄５０＝輸＄２５０００。

睇完上面兩個例子我諗大家應該識點計賺蝕。不過係上面既例子中可以見到另一種潛在風險，「裂口式上升／下跌」。

有時個市係夜晚或者深夜時段會出左ｄ突發消息，或者受外國影響而令到下一日港股開市一開就跳空左幾十點，幾百點甚至過千點，呢ｄ情況叫裂口。

裂口可能就會導致好似上面個情況咁，本身預計止蝕係３００點輸萬五蚊，點知裂口令自己輸多左２００點。

要降低呢一種風險既話我有幾個建議，１）唔好買咁大過夜，例如唔好用大期而係用細期，咁意外輸既錢都會少ｄ。２）直頭唔好過夜，係收市前平倉。３）夜晚有夜期時段，有咩唔對路夜晚都可以走，但只係去到１１：４５。４）過夜既話你就要預有可能有呢ｄ情況，所以你既交易應該要包含左呢種風險係計算之內。利申，我自己就好少做即日平倉既交易，我自己既交易系統都係預計晒有可能有呢ｄ大裂口出現。

期指交易時段

期指交易時期同股票係有ｄ唔同，香港股票可以自由交易既時段係９：３０－１２：００；１３：００－１６：００。

期指交易時段係９：１５－１２：００；１３：００－１６：１５。

另外仲有夜期時段１７：００－２３：４５

－－－－－－－－－－－－－－－－－－－－－－－－－－－－

期指結算價

呢樣野真係要特別拎黎講，因為我發現有幾個炒左一年半載期指既朋友原來都唔知道，期指結算日呢一日，期指個價既計法係點計。

首先，期指結算日係定係每月最後一個交易日之前果一日。以而家２０１６年２月為例，最後一個交易日係２月２９日（星期一）。前一個交易日係２月２６日（星期五）。

跟住要講一講期指結算日個價既計法點解要咁計既原因先。

假設我係大戶，如果我係１８５００點買左五萬張大期ＬＯＮＧ的話（睇期指向上），只要我係期結果日，最後３０秒，一次過用一百億買重恆指成份股比重最高果幾隻股票，恆生指數隨時會１分鐘內突然升高５００點，然後就直接收市。咁我果５萬張大期每張就可以賺５００點，即係賺５００００張＊５００點＊＄５０＝賺１２億５千萬。然後收市後再係外圍市場，或者第二日係市場上賣返晒果一百億推起個市既貨，咁就好簡單地賺到１０億８億。大戶咁樣賺錢，輸錢既一定係散戶啦，所以呢個咁屎忽既招數係要被ＢＬＯＣＫ，點樣ＢＬＯＣＫ呢？就係用呢個計法：

期指結算價計法

期指結算日當日開市後，每５分鐘取恆生指數既點數一次直至收市前５分鐘為止。呢段時間入面每５分鐘既點數既平均數就係期指結算價。

咁樣計既話，大戶就唔可以係最後一分鐘推起個市令個期結價突然太高或太低，不過佢地仍然係有屎忽招出，奇中一招我都經常見到，你地都可以留意一下：

由於係取每５分鐘既價，所以大戶可以一朝早一開市就推起個市，然後個市一直係高位唔肯跌，但係去到下午３點左右會突然間暴跌，原因係９點半至１５點呢段時間既恆指平均值已經夠高，即使最後１個鐘暴跌，都唔會拉到個期指結算價太低。佢地就係３點左右開始放走之前為左推起個市買左既股票，所以３點就突然暴跌。

－－－－－－－－－－－－－－－－－－－－－－－－－－－－

轉倉

期貨有一個術語叫轉倉，簡單Ｄ黎講即係將某個月既期貨轉去另一個月既期貨。

例如我將今個月２月到期既期貨，轉去３月先到期，咁就叫轉倉。

點解要轉倉呢？我舉個例，我係２月２４日ＬＯＮＧ左一張細期＠１８０００（睇好），我止賺係２００００點，止蝕係１６０００點。但岩岩先醒起原來去到２月２８日佢就期結，到期既話我張期指會比佢平倉，並非我計劃之內既事，所以我想改佢到期日去到３月到期。

具體既方法其實極容易，只係將２月到期果張ＬＯＮＧ平左倉，再即時係３月買返一張ＬＯＮＧ就得。

就係咁低能既方法。

通常咁樣一買一賣會蝕５點之內,５點ＭＨＩ既話就大約＄５０，如果你手勢好，或者券商有轉倉功能既話，只係蝕１－２點都係可以做到。

（注意轉倉唔好係期結日轉，最好早幾日，除非你係有心想博果日期結結算價既方向）

你可能會問點解我一開始唔買３月到期果張，而係買２月期果張之後又轉做３月？

係上面呢個CASE黎講的確係一開始就買３月係好Ｄ，可以免除轉倉可能用到既成本

平時買賣期指你都可以買遠Ｄ期，但個問題就係遠期既期指通常差價會大少少，不過都只係幾點，同埋流通量少低ＤＤ，問題不大。

－－－－－－－－－－－－－－－－－－－－－－－－－－－－

後記

終於打晒期貨同期指既教學，我諗足足寫左超過２５小時，我成世人都未試過寫咁多野，剩係呢篇２都過左８０００字，加埋上一篇（１）４２００字單係「期貨／期指」教學就超過１萬２千字。

不過我覺得我可能仲有Ｄ野係未寫，有咩唔明既話你地可以係到留言問

其實我當初諗住期貨既教學用１－２個鍾就寫得完，因為相比起期權黎講期貨已經係好簡單既事，而家我對於寫期權教學有一種恐懼……

另外從呢一篇開始，我諗我一星期出一篇文左右啦，如果有多既你當係BONUS好喇，因為我雖然已經日日寫，但要用心機要諗要鋪排又要寫得大家清楚明白，一定係寫得唔快，我辛苦到咁都仲有巴打仲HI我問我幾時先出文。我都已經寫文寫到冇乜時間研究新系統，冇乜時間睇書進修了，希望大家明白。

頭盔就戴完喇，我都係會繼續努力出文！根據我之前既計劃，我下一篇係會講咩叫牛熊証，等大家明白點解好多人都叫唔好買牛熊証既原因～

#期貨 #港股 #股票 #股票教學 #投資 #期貨教學