「中環夏誌2023」展出經典巴士 記得睇活動完結之前去參觀呀！

話說喺中環海濱活動空間舉行嘅「中環夏誌2023」活動，當中有「One Citybus」展覽，活動開始嗰陣時巴士台有報道過頭段展覽係包括5架各自披上1款新巴士車身塗裝設計嘅城巴巴士。

城巴新巴即將合併 5款新城巴車身色彩 「中環夏誌」中展出 全港市民可以上網投票篩選

隨著投票結束，所謂「公眾投票」選出嘅最後兩強進入城巴公司員工投票，結果大家都知道城巴揀咗邊一款嚟到取代曾經令港島居民寄予厚望嗰間「前．新巴」嘅標誌性橙白綠車身色彩。

當原本嘅公眾投票結束，「One Citybus」展覽就將原本嘅5架候選新巴士清新塗裝設計嘅樣板巴士換走，起初就擺咗威馳騰WSD6121BR1EV電動雙層巴士（車隊編號：8910，車輛登記：HR3878）。

對一班「追捕巴士」達到⭐⭐⭐⭐⭐⭐級別嘅專業巴士迷嚟講，威馳騰WSD6121BR1EV電動雙層巴士可能就已經之前「影到爛」，又要無得「👏🏻死氣喉」就真係爭啲。

當臨近展覽期尾聲嘅時候，「One Citybus」展覽再次更換展覽嘅巴士，帶嚟2021年1月「翻噴」、3月「過檔」非專利部兼更換車輛登記嘅城巴12米版本Dennis Enviro 500型雙層巴士（車隊編號：8206，車輛登記：RL4470→AD4589）。

或許好多人都會話，香港地一街都係Enviro 500，無乜特別。不過擺入嚟「One Citybus」展覽嘅呢一架其實可以話有特點嘅：城巴公佈咗會更換巴士車身色彩嘅時候，2021年「翻噴」嗰陣換上1990年代城巴車身塗裝，仲貼埋舊城巴標誌，車頭牌箱頂部以及左右兩邊都貼返呢個經典嘅城巴「食鬼」標誌…

正好畀大家睇返
城巴原本就已經有一個靚嘅車身色彩

當然如果你話你生活喺人世「有咁上下年資」（aka「老」）嘅話，「One Citybus」展覽都仲繼續有呢4架「老人家」巴士畀你「緬懷過去」：

• 前．中巴31呎版本珍寶巴士（車隊編號：SF3，車輛登記：CB5930）
• 前．城巴利蘭亞特蘭大巴士（車隊編號：633，車輛登記：FS7534，「坡柴 / 黃老太」，配1993年「Network 26 新里程」標語）
• 前．新巴10.3米版本丹尼士三叉戟型巴士（車隊編號：3354，車輛登記：KS5331）
• 前．新巴12米版本富豪超級奧林比安型巴士（車隊編號：5102 ，車輛登記：KV3603）

係咪細個嗰陣啲回憶返晒嚟呢？

呢個週末就係「中環夏誌2023」嘅最後兩日喇！現場除咗可以睇巴士之外，仲有啲彈床同埋市集，仲唔快啲把握時間親住喺灣仔睇完書展嘅時候，帶埋你屋企嘅老老嫩嫩去睇吓？

中環夏誌 Central Harbourfront SummerFest 2023

開放日期：2023年6月9號到7月23號
星期一至五 15時 ~ 21時
星期六、日及公眾假期 13時 ~ 21時
開放時間因應當日舉行嘅特別節目而更改。請留意特別節目時間表。

地址：中環龍和道9號 中環海濱活動空間 Central Harbourfront Event Space