【明報專訊】下個月22號就係大年初一，唔少市民都想換定新銀紙封利市過年，匯豐、渣打同中國銀行3間發鈔銀行將喺下月5至21號提供換新鈔同「迎新鈔」（即雖舊仍簇新嘅鈔票）畀市民兌換。市民今個月31號起，可以喺3間銀行嘅手機程式或網頁預約。金管局提醒，市民毋須趕喺服務頭幾日去銀行，銀行會確保換鈔服務期間新鈔及「迎新鈔」嘅供應。
3間發鈔銀行分行喺提供換鈔服務嘅頭3日即下月5至7號，營業時間將由早上9點提早到8點開始，呢個時段分行只會提供換鈔服務。匯豐、渣打同中銀都會提供總值3000蚊包括100張20蚊紙、20張50蚊紙嘅新鈔套裝。匯豐客戶可以喺當日朝早即場攞籌，同日指定時間換鈔；渣打同中銀亦有派籌安排。
其中渣打銀行限制每人每次兌換新鈔數量，10蚊最多50張、20蚊100張、50蚊20張、100蚊20張、500蚊20張、1000蚊10張；「迎新鈔」就不設上限。
金管局又鼓勵市民利用電子支付方式，包括透過網上或手機銀行使用「轉數快」，或者其他電子錢包派利市。
