【明報專訊】本報前晚網上報道，一田百貨部分店2月中農曆新年後開始削減經營規模，一田百貨噚日正式喺社交媒體公布詳情，涉及沙田及大埔一田店，兩區超市會繼續營業，但部分櫃位會刪減。沙田店在2月14日起重整「百貨部」，化妝專櫃、休閒/運動服飾及內衣飾品將停止服務，其他銷售部門如嬰兒、玩具等會移到2樓。大埔店則於2月19日起重置，化妝專櫃、休閒/運動服飾、童裝、內衣飾品、行李、家電及玩具部門會停止服務。
唔少顧客都喺一田facebook留言查詢，有人問「會唔會減價清貨呀？」，有人就話「 山姆每天都vip day」，問一田幾時有購物日。
立法會批發及零售界議員邵家輝同Emily講，唔能夠評論個別商戶經營策略及業務調整。邵指按統計數據，近月零售貨額有增幅，但主要涉及部分奢侈品，日用品、超市貨額下跌，尤其以新界北部地區跌幅最高，部分達雙位數。佢話𠵱家唔少港人周末北上消費，到內地大型商場及新超市購物，自然會影響在港消費。
邵家輝話如果開放更多關口24小時通關，會便利更多港人，有助大灣區融合，但𠵱家港人可以隨時北上，而深圳居民只可「一周一行」來港，故應盡快回復「一簽多行」，便利內地人來港。
