Dr Grof Eberhard III. vu Wirttebärg

Dr Eberhard III., gnännt „dr Mild“, (* no 1362 vermuetli z Stuegert; † 16. Mai 1417 z Geppenge) isch Grof vu Wirttebärg vu 1392 bis 1417 gsii. Är isch dr Suhn vum Grof Ulrich vu Wirttebärg (* no 1340; † 1388) un dr Elisabeth vu Bayern (* 1329; † 1402), Dochter vum Chaiser Ludwig em Bayern gsii.

Anne 1380 het er d Mailänder Grefi Antonia Visconti ghyrote, d Dochter vum Bernabò Visconti. S ainzig Chind us däre Eh, wu elter woren isch, isch dr speetere Grof Eberhard IV. gsii. Noch em Dod vu dr Antonia am 26. Merz 1405 het dr Eberhard d Elisabeth vu Nirnberg ghyrote, d Dochter vum Burggroof Johann III. vu Nürnberg, (Ehabred am 27. Merz 1406, Bylager erscht 1412).

Syy Regierigszyt isch bregt gsii dur syni Bindnisbolitik mit andere Firschtehyyser un Rychsstedt go dr Friid z halte, zem Byschpel s Bindnis mit 14 oberschwebische Stedt, wu am 27. Augschte 1395 gschlosse woren isch, un dr Marbacher Bund vu 1405. E wichtige militerische Erfolg isch dr Siig gege dr Schleglerbund anne 1395 bi Heimsheim gsii. Di wichtigscht territorial Erwärbig vum Eberhard isch d Grofschaft Mömpelgard gsii, wu dur d Verlobig vu sym Suhn, em spetere Grof Eberhard IV. mit dr Henriette vu Mömpelgard zstand chuu isch. D Henriette isch di eltscht un erbbrächtigt Dochter vum Grof Heinrich vu Mömpelgard gsii. Dr Eberhard III. het d Grofschaft Mömpelgard bis 1409 regiert un het si derno an sy Suhn Eberhard IV. ibergee.