VISITA DE JORGE CAMPOS

O pasado 30 de abril visitounos Jorge Campos para introducirnos no mundo dos cómics e a súa relación co noso PDI OSeisMedia, posto que tanto o cómic como o mundo audiovisual buscan contar unha historia a través das imaxes.

A rapazada puido descubrir como se chama o cómic en diferentes idiomas (banda deseñada, fumetti, cuadrilos, bande dessinée...) e como eses nomes dependen principalmente de como se lle chama ao elemento fundamental que os forma: a viñeta ou o bocadillo.

Tamén nos falou un chisco da produción e edición dos cómics usando como exemplo os que el mesmo creou.

Ademais falounos de diferentes elementos que forman parte dos cómics: viñetas, bocadillos, onomatopeas...

E tras un tempo de preguntas para resolver as inquedanzas da rapazada de 5º, crearon un pequeno bosquexo de 4 viñetas para pechar o obradoiro.

RETO "OSEISMEDIA"

No terceiro e último reto deste curso Broli propón que, empregando materiais que teñamos por casa e unha boa dose de imaxinación e creatividade, recreemos a portada do noso libro favorito.

Tedes ata o 25 de maio para enviar a vosa portada e a recreación ao correo da biblio:

bibliotecaseisdonadal@gmail.com

Con todos os traballos que presentedes faremos un vídeo!!!

Animádevos!! Agardamos as vosas respostas!!!

BIBLIOLAB: PALABRAS, CONTOS E CÓMICS

No mes de abril, as actividades que se desenvolveron na BiblioLab tiveron como eixo temático as palabras, os contos e os cómics.

                              CÓMIC CUBIK

Un libro-xogo formado por nove cubos que ordeamos para ler os contos.

                                  CÓDIGO SECRETO

Desciframos as mensaxes e descubrimos os títulos de varios contos (carapuchiña vermella, brancaneves e os sete ananiños…).

                                      PASATEMPOS

Sopas de letras e crucigramas para xogar coas palabras.

                                   CAIXA DE CONTOS

Creamos diferentes historias unindo as pezas do puzle combinando as ilustracións e as esceas.

                                              PALABREA

Quen é o primeiro/primeira en atopar unha palabra da categoría que indica a carta e que comence  pola letra da mesma cor.

   STORY CUBES

Tiramos os dados e unimos as imaxes para crear historias.

                                        FAST WORDS

Un xogo no que formamos palabras que teñan relación co tema proposto.

                                              CÓMIC

Inventamos e completamos historias de banda deseñada.

"AS ALUMNAS" NO CLUB DE LECTURA

Este mes o teatro foi o protagonista do Club de Lectura “Ás seis no Seis” da man da maravillosa e polifacética Paula Carballeira.

A autora conversou sobre a súa obra “As alumnas”, Premio Nacional de Literatura Dramática 2023.

Ao longo da tarde, acompañamos a Elvira e a Rosa, que parecían cobrar vida nas palabras de Paula, no seu desexo de encontro. Destacamos os aspectos máis salientables da lectura, enriquecidos polos apuntamentos da autora, o seu traballo de documentación, reflexións sobre o novo teatro occidental e a figura de director ou directora de escena e ata experiencias persoais.

Asistimos á posta en valor da figura de María Barbeito e tantas mestras silenciadas no franquismo mediante o xogo e as palabras da nosa lingua. Grazas ao labor de Paula con “As alumnas”, ao traballo a prol dunha educación libre e igualitaria e a lingua non caerán no esquecemento.

O peche da xornada foi a sinatura dos exemplares e compartir un café con postres caseiros.

Agora, só queda o agradecemento a Paula e a vontade de reencontrarnos con “As alumnas”, este vez, nos teatros.

NUKA NO SEIS

Varias persoas usuarias e persoal do Centro de Día Atendo visitaron o noso cole para impartir unha charla sobre "Roboterapia con Nuka".

Explicaron que era un robot, as súas aplicacións na industria alimentaria, forzas de seguridade, rehabilitación e como terapia.

Presentaron a Nuka, un robot xaponés que imita a unha  cría de foca arpa e que reacciona con sons e movementos á interacción humana. O seu creador é Takanori Shibata.

Explicaron  o seu funcionamento e como hai que coidar a Nuka.

Este proxecto “Nuka na escola” ten por obxectivo cambiar a imaxe que teñen os nenos e nenas das persoas maiores.

Previamente, os cativos e cativas de 1º de Primaria, fixeran un debuxo, “Que é para ti unha persoa maior?". Con todos eles fixemos un libriño que entregamos a Teresa, Consejo e Tusa.

Chegado o momento todos e todas poideron tocar, acariciar e peinar a Nuka. 

Cada neno e nena recibiu como agasallo un debuxo para colorear e unha imaxe de Nuka.

Grazas a Teresa, Consejo, Tusa e Bea por vir e facernos participes deste fermoso proxecto no que establecemos vínculos emocionais!!!

Esta actividades esta enmarcada no proxecto interxeracional que desenvolvemos co Centro de Día Atendo dentro do programa Bibliotecas Escolares Solidarias.

VISITA DE IRIA MISA

No mes dos libros chegou esa cita tan desexada, polo alumnado de 5º e 6º de Primaria, para coñecer a Iria Misa, a autora do libro "Unha veciña de película".

Iria visitounos o 25 de abril para contarnos cando xurdiu a idea de escribir este libro, e é que a pandemia brindoulle unha oportunidade para deixar voar a súa imaxinación e crear este libro tan orixinal e divertido. 

Compartiu tamén algúns segredos sobre a elección das películas, do mundo editorial, do seus gustos literarios e incluso nos confesou cal foi o capítulo que máis lle gustou escribir.

Por outra banda compartiron unha quenda de preguntas moi interesante onde o alumnado estaba ávido de coñecer que pasa coa veciña, por que marcha?, vai volver?... E Iria moi xenerosa confesoulles que vai haber máis libros onde Elsie e Simón aparezan e quizais tamén esa veciña tan peculiar, pero haberá que esperar un chisco para descubrir que lugar visitarán nesta ocasión.

Grazas pola visita Iria!!!

PROGRAMA DE RADIO "DÍA DO LIBRO"

Xa está aquí un novo programa da Radio do Seis.

As clases de 2ºB e 6º de Edº Infantil B prepararon un programa sobre o Día do Libro con información sobre esta data e recomendacións literarias.

Desfrutadeo!!!

FAMILIAS QUE CONTAN

Neste mes no que os libros son os protagonistas, as familias continúan vindo á biblioteca a contar contos.

Grazas por compartir as lecturas e o voso tempo con nós!!!

Marta, nai de Luis, 6º Edº Infantil e Noa, 1º de Primaria, “Daniela y las chicas pirata”, a aventura de Daniela que surca os mares coa súa tripulación e as súa peripecias.

Roberto, pai de Lois, 6º Edº Infantil, contounos o que lle gustaba comer a un coello, “Sopa verde”.

Merchi, nai de Xiana, 3º de Primaria, contounos “Linda á espreita”, a historia dunha vaca, un carteiro perseguido e unha granxeira que só quere recibir, por fin, un paquete san.

Eduardo, pai de Daniel, 3º de Primaria, a historia de árbores que nos fan compañía, “Arboles”.

Carolina, nai de Maxi, 4º de Primaria, un conto interesante.

VOLUNTARIADO NO CENTRO DE DÍA ATENDO

O venres 19 de abril, o voluntariado da biblioteca visitou o Centro de Día Atendo. Actividade enmarcada no proxecto Interxeracional que desenvolvemos dentro do Programa Bibliotecas Escolares Solidarias.

Un recibimento moi fermoso e con moito agarimo por parte dos usuarios/usuarias e persoal do centro.

Escomenzamos contado “A que sabe a lúa”, co reparto de obleas para que nos dixeran a que lles sabía. A continuación, un pequeno recitado de poemas de Luisa Villalta homenaxeada co gallo do Día das Letras Galegas 2024.

Teresa, Tusa e outras usuarias foron lendo refráns populares para que nós foramos completando. Algúns xa os coñecíamos pero outros era a primeira vez que os escoitabamos!!!

Compartimos merenda, sorrisos, afectos e cariños!!!

Un momento emocionante foron as lecturas compartidas, nas que lemos contos con diversa temática.

Non queríamos despedirnos sen entregar os agasallos, marcapáxinas e o poema “Parece unha rosa” feita polos cativos e cativas de infantil de catro anos.

Palabras de agradecemento de Teresa e entrega a cada neno/nena dunha libreta artesanal feita por eles/elas.

Grazas ao todo o Equipo do Centro do Día Atendo por esta fermosa xornada chea de emocións!!!

DÍA DO LIBRO 2024

Hoxe, 23 de abril, celebramos o Día do Libro, dun xeito moi especial e cunha actividade de longa tradición no noso centro, ”Madriñas lectoras e Padriños lectores”.

Festexamos esta data cun tempo solleiro e, libros ao patio na Hora de Ler, compartindo lecturas e acompañando os máis maiores (3º, 4º, 5º e 6º de Primaria) aos máis pequenos do cole (Infantil, 1º e 2ºde Primaria).

A semana pasada, as madriñas e padriños, estiveron escollendo o libro que ían ler aos seus afillados e afilladas, e estes prepararon fermosos marcapáxinas para agasallalos.

Foi unha xornada chea de emocións na que os máis cativos e cativas estiveron escoitando con moita atención as lecturas.

Libros para soñar, para agasallar, para imaxinar, para crear, para compartir…!!!

FELIZ DÍA DO LIBRO!!!