周吉佩《逆天奇案2》唱主題曲 盼有機會參演劇集詼諧角色

周吉佩 除咗炮製自己嘅歌唱作品之外，亦開始打入劇集歌曲市場，繼之前灌錄劇集插曲之後，早前佢亦為重頭劇《逆天奇案2》唱主題曲，吉吉錄音前心情都好緊張，為咗配合劇情緊湊嘅節奏，佢話音樂節奏上亦一樣咁緊湊，而且更加入搖滾元素，所以吉吉話佢會擺脫以往溫柔唱腔，嘗試用雄厚嘅聲線演繹，佢話呢個先係最大嘅考驗。

雖然吉吉無緣參與劇集嘅演出，但吉吉同劇中主角之一嘅陳展鵬就早有淵源，吉吉話其實同展鵬都合作過幾次，第一次就係幫展鵬新歌彈結他同伴唱，而第二次就係喺節目《大笪地唱不停》合唱過，而今次可以為展鵬有份主演嘅劇集唱主題曲，所以吉吉都覺得好有緣，加上佢覺得展鵬一直以嚟，都好似哥哥一樣照顧佢，比佢好多鼓勵。

吉吉話自從自己首新歌MV推出後，好多朋友粉絲都提議佢試下拍劇，吉吉就話對詼諧角色幾有興趣，因為感覺無咁大壓力，反而要演一啲喊戲或者扮Chok嘅戲份，佢就話驚自己駕馭唔到啦。