大胃王小林尊宣布退役 失去肚餓感覺 試過3日冇進食都唔覺

多次勝出大食比賽嘅日本大胃王小林尊，曾經喺美國紐約嘅熱狗競食大賽取得6連冠，最高紀錄更試過鯨吞64.5隻熱狗，胃納相當驚人。最近小林尊現身Netflix資訊節目《健康解密︰腸道的奧秘》，喺節目中宣布退出競食界。

《健康解密︰腸道的奧秘》解構人類腸道、飲食同健康嘅關係，當中提及腸道同腦部神經嘅關係。小林尊喺節目提到，自己完全冇哂肚餓嘅感覺，佢太太就話小林尊試過完全唔為意3日冇食過嘢仲居然冇感覺。後來醫學專家檢查小林尊嘅腸道細菌情況，並未發現任何異常，但從腦部掃描就搵到原因，估計小林尊長期為競食比賽準備，令腦部停留咗喺比賽模式，將進食變成任務。小林尊聽到之後開始擔心自己嘅健康，於是宣布退役，並嘗試重新感受食物，節目中佢同太太仲將當年鯨吞嘅熱狗，加入美味食材，令自己更為享受。

今年46歲嘅小林尊投身競食界超過20年，佢喺23歲時參加日本電視節目嘅大胃王環節，食咗60盤壽司、2.7公斤薯仔以及16碗拉麵等，並以新人姿態擊敗對手而一戰成名。同年（2001年）小林尊參加紐約嘅熱狗競食大賽一口氣食咗50隻熱狗奪冠，數量係舊紀錄嘅一倍！小林尊成名後，喺2005年來港比賽都輕鬆奪冠。小林尊曾經透露，佢靠「大食」搵食，每年收入最高可以超過1億日元（現時折合約500萬港元）。

https://hk.news.yahoo.com/%E5%A4%A7%E8%83%83%E7%8E%8B%E5%B0%8F%E6%9E%97%E5%B0%8A%E5%AE%A3%E5%B8%83%E9%80%80%E5%BD%B9-%E5%A4%B1%E5%8E%BB%E8%82%9A%E9%A4%93%E6%84%9F%E8%A6%BA-%E8%A9%A6%E9%81%8E3%E6%97%A5%E5%86%87%E9%80%B2%E9%A3%9F%E9%83%BD%E5%94%94%E8%A6%BA-034200725.html