聲夢1+2丨羅毓儀玩Game成老鼠屎拖累隊友 Duncan用手摸曱甴嚇窒眾人

《聲夢傳奇》家族首個音樂綜藝《聲夢1+2》逢周六晚上8點翡翠台播映，節目主持森美召集《聲夢》兩季畢業生齊齊玩音樂玩遊戲，更衝出香港玩到去澳門，節目每集均邀請「Sing」級外援嘉賓，與一班《聲夢》畢業生玩到癲！
《聲夢傳奇》家族首個音樂綜藝嚟到第二集。《聲夢》兩季畢業生齊齊玩音樂玩遊戲，更衝出香港玩到去澳門。森美擔任主持！

今集內容同樣豐富又爆笑，《聲夢》畢業生分成兩隊大比拼，分別係紅隊Venus（林沚羿）、Aeren（文凱婷）、Maggie（趙頌宜）、Desta（李茵彤）、火雞（孫漢霖）、Kim（金永衡）、Rock（何晉樂），對戰藍隊就有Felix（林智樂）、Sherman（潘靜文）、Duncan（侯雋熙）、Zayden（彭家賢）、Angel（劉詠彤）、Pamela（趙小婷）同Crystal（梁芷菁），紅、藍隊分別請嚟羅毓儀（Yuki）、譚嘉儀擔任嘉賓一齊玩轉澳門。
Duncan 用手摸曱甴真係好驚嚇！遊戲「我有你冇」中，Venus 話自己拍過荷里活電影《蜘蛛俠 2》，成功「KO」對面隊！

首個熱身遊戲「我有你冇」，每隊輪流派人講出認為僅自己做過、對面隊冇人做過嘅嘢，當中最嚇窒全世界莫過於Duncan自爆試過用手摸曱甴，成功一挑七贏盡7分，到底背後有咩原因？而曾參演《蜘蛛俠2》嘅Venus以演出過荷里活電影「KO」敵方，雖然Duncan亦為《蜘蛛人：穿越新宇宙》蜘蛛俠配過音，可惜因為一個原因「飲恨落敗」。
紅隊同藍隊分別邀來羅毓儀及譚嘉儀擔任嘉賓。羅毓儀同譚嘉儀 battle「你吹我唱爆波波」。

轉戰澳門嘅遊戲環節同樣精彩，共分三個回合進行「你吹我唱爆波波」，各隊每回須各派出一隊員輪流唱歌，該隊員唔使唱歌時就盡快爭取時間吹脹敵隊氣球，最快吹爆者可以得分。當中兩隊嘉賓羅毓儀與譚嘉儀對戰，Yuki十分驚青一度唱到震晒音。《聲夢傳奇2》冠軍Jasmine（任暟晴）喺「倒播估歌仔」遊戲時隔空登場，負責錄音出題畀兩隊估歌仔，兩隊各員輪流模仿倒播歌詞競猜係咩歌，製作組即場錄音後會再將錄音倒播回復「歌曲原貌」。紅隊羅毓儀賽前雖然自稱聆聽考試曾奪5**最優異成績，但比賽卻因「金魚記憶」累事，聽到隊友一頭霧水，慘成老鼠屎。
羅毓儀自稱聆聽考試奪得 5**最優異成績，點知因為「金魚記憶」而慘成老鼠屎！Jasmine（任暟晴）隔空登場。Zayden 嘅藍隊表現相當出色。

今集繼續有「搶Fo大作戰」，此遊戲可謂挑戰體能極限，兩隊喺四部唔同位置嘅相機前擺出特定歌曲MV經典甫士，當中羅毓儀玩到連仆兩次，繼續做「老鼠屎」，仲有「澳門聲夢擂台」battle動漫主題曲，穿露肩裝示人嘅譚嘉儀打頭陣獻唱《美少女戰士》，同場加映羅毓儀、Rock、Angel及Felix挑戰日語主題曲《Idol》，炒熱現場氣氛！
羅毓儀、Rock、Angel 及 Felix 挑戰日語主題曲《Idol》，炒熱現場氣氛！「搶 Fo 大作戰」環節根本係考體能。羅毓儀玩到仆倒，仲連仆兩吓，認真陰功豬！「澳門聲夢擂台」battle 動漫主題曲，譚嘉儀穿露肩裝獻唱《美少女戰士》。