趙頌茹慶幸市道唔好冇被壓價開電視推美食節目鼓勵港人留港消費丨獨家

更新時間：07:00 2024-05-13
發佈時間：07:00 2024-05-13

港人北上消費成為常態，香港市面顯得冷清，商舖面臨大挑戰。香港開電視由6月起連串推出3個美食節目《香港必食40道菜》、《全港開餐100強》及《一人一個美味故事》，希望港人能多留港消費，打頭陣有《香港必食40道菜》在6月17日起逢周1-5晚8時半推出，由趙頌茹(阿Yu)及李日朗舊愛黃靜藍主持，兩人慶幸在逆市下接Job未被壓價，非常感恩。採訪：方騫平場地：龍莊

《香港必食40道菜》由名廚楊國基(Billy)帶路搜尋經典及失傳名菜，包括改用素翅、頂鴿、高湯炆燉釀製的「仙鶴神針」、蟹砵蒸蛋、蒸和順魚及黃扒魚肚等，Billy師傅亦會跟主持人交流煮家常菜心得，如番茄炒蛋做法各有不同，點樣整先最好食。

李日朗舊愛「好大食」

去年尾，29歲的藍藍跟李日朗分手，今年2月公開跟餐飲集團執行董事Wilson拍拖。她晒命式放閃說：「佢追緊我，梗係訓練佢為我下廚啦，意粉及漢堡包都係佢拿手菜，我最鍾意佢唔使我煮，平日工作已好攰，煮完仲要洗好辛苦，唔煮就買外賣。」仍然單身的阿Yu表示：「平日返工、湊女咁忙都冇乜私人時間，而且我唔enjoy拍拖，都係做嘢賺錢最實際，好彩大家都體諒我係單親媽媽，接job冇被壓價。」

另外，其中一集到「食神」梁文韜經營的酒樓取景，Billy師傅大爆「瘦蜢蜢」的藍藍原來好大食，當日她食完白粥，掃清枱上腸粉、馬拉糕、大包等多籠點心，仲食到津津有味，韜韜因而封她成為「食神」接班人，形容尋尋覓覓咗20多年，終於搵到了。藍藍解釋除咗為食，都唔想浪費食物，所以自己好啱做飲食節目主持。