東張西望︳何太低調受訪收起行頭 轉頭大晒十萬蚊拳頭大龍鳳鈪

全城關注嘅《東張西望》何伯何太訪問，終於喺周一晚播出。上次何太出鏡「穿金戴銀」，有網民計過數估計共值約36萬8千，仲未計真貨價值過百萬嘅疑似愛瑪仕名牌手袋，令人質疑衣著咁光鮮係咪有資格住公屋。

而尋晚嘅訪問中，何太將上次亮過相嘅珍珠頸鏈、耳環收埋，換上一金一銀手䤥，襯埋同何伯一人一隻嘅情侶勞力士錶，加上訂情鑽戒，唔輸人更唔輸陣。對於被指行頭有成36萬，何太解釋耳環係假，手袋係A貨，至於珠鏈就係早年買入，值2萬幾蚊，強調「邊買到咁貴吖，其實呢啲都唔值錢。」。

不過到主持梁敏巧問何太何伯送過咩，何太都係忍唔住晒出何伯今年情人節送上嘅定情信物 － 一對大過拳頭嘅龍鳳鈪，睇到梁敏巧哇一聲。何太數口精，話2隻加埋接近4両，要成＄99,900。即使情比金堅，何太戴住咁大隻足金龍鳳鈪都話「佢咁錫我真係好難得，從未有人咁樣為我使錢」。

而家何伯身家由450萬變成得返4200蚊，何太話何伯試過叫佢將隻名錶拎去當，但何太好霸氣話「我都唔要，我仲有錢，我頂得住。萬一我聽你話拎隻錶去當，仲畀你啲仔女話我係騙子呃你錢」。何太強調「我係好注重名聲嘅人！邪不能勝正！」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！