「大簡」領軍首勝　烏甸尼斯逃離降班區

周二(14日)凌晨意甲，烏甸尼斯作客以2比0擊敗萊切，亦係新帥簡拿華路上月接手領軍之後，首場勝仗。烏甸尼斯贏波之後，由賽前排尾三，一口氣升上第15位，逃離降班區。

簡拿華路之前帶領烏甸尼斯踢3場聯賽，分別補賽不敵羅馬，以及打和博洛尼亞、拿玻里，今仗遇上實力較弱嘅萊切，終於威番1次。烏甸尼斯一開波就反客為主，頻頻發動攻勢，並喺36鐘由羅倫素盧卡頂入打開紀錄。

烏甸尼斯領先之後，踢法明顯轉趨保守，被萊切搶番唔少攻勢，幸好門將奧基爾表現穩陣，加上萊切球員頻頻失機，避過被扳平危機。戰至85分鐘，烏甸尼斯中場拿沙沙馬迪錫，把握對手門將撲出不遠，補射入網，奠定2比0勝局，亦係烏甸尼斯近8場聯賽首次贏波。

由於護級對手費辛隆尼、卡利亞里、安玻里較早前都輸波，烏甸尼斯贏波後，由第18位升上第15位。烏甸尼斯最後2場對手正係護級份子安玻里、費辛隆尼，成為3隊之間嘅護級生死戰。