六合小廚 (已結業)

上個星期日，見無野做，走左出去尖沙咀濕平～ 見約左朋友未夠鐘，肚仔有啲餓，決定去搵啲野食醫肚～ 亂打亂撞，走左去六合～我都唔知幾多十年無見過尖沙咀有 三字頭既 下午茶餐喇～ 真係比神跡更加驚喜～ 星期日下午5點3左右， 仲係下午茶時段由於係樓上鋪，所以知既人唔多， 眼見都係西裝友、附近sales 幫襯～ 睇黎真係要識窿路至會識黎～ 可想而知我真係好為食～ 咁都比我發現到呢間正野! 我敢講，絕對係廣東道最平下午茶。 反觀澳X茶餐廳食水幾深呢～ 唉～ 車仔面既送都算多選擇～ 基本要有既都有～ 下午茶仲包熱飲～ 車仔面一上台，我嘩左一聲～ 大過我塊面丫！ 正常一個女仔唔會食得曬～ 我勁大食都係勉強食得曬～ 真係勁多！ 講下好唔好食先～ 我覺得就係平時正常車仔麵味道～ 無話好有驚喜～ 但都唔差架！ 最重要大件夾抵食！ 米粉唔會話好削，有口感，韮茶餃韮菜味濃，豬紅有口感無腥味，蘿蔔清甜大件。我個人幾推薦佢個麻辣汁，惹味夠香辣～ 車仔麵既精華！ 問心，以價論質素黎講，38蚊又有餐飲，我真係覺得無得輸！小店要係尖沙咀生存絕對唔易，仲要係廣東道既樓上鋪～ 我真心希望呢間小店生意興隆！繼續保持水準