【明報專訊】近期政府倫敦經貿辦員工出咗負面新聞，立法會公務員及資助機構員工事務委員會噚日討論公務員參與義工服務，民建聯林琳提出，本港駐海外經貿辦員工應積極做義工，更可以「一雞幾味」提升香港形象。公務員事務局長楊何蓓茵回應，經貿辦人員較少、工作忙碌，重申佢哋會落力「說好香港故事」。
林琳話，本港公務員積極做義工，駐海外經貿辦嘅員工都可以喺當地參與義工服務，「當地ETO（經貿辦）對我哋說好香港公務員正面故事，都係有正面效果，當地會唔會做一啲義工服務，而令香港嘅形象做得好呢？」楊何蓓茵未有正面回應會唔會鼓勵經貿辦人員做義工，話無相關資料，但就話辦事處員工較少、工作繁重，即使周末亦要做推廣，有時仲要飛去其他地方。佢強調喺外地「說好香港故事」係經貿辦嘅使命，相信公務員會落力去做。
顏汶羽倡18區開公務員關愛隊
民建聯顏汶羽建議公務員義工隊與18區關愛隊合作，如於極端或寒冷天氣一齊出動，「甚至18區各開一隊公務員關愛隊」。楊太話一定會考慮合作，已向公務員義工隊提供關愛隊聯絡資訊同工作範疇，鼓勵佢哋服務時聯絡關愛隊。