O xoves 16 de maio ás 20.00 horas, o centro universitario da UNED en Monte Porreiro será o espazo en que o poeta galego-venezolano Simón Rodríguez, residente en Lugo e gañador do Premio de Poesía O Facho 2023, ofrecerá un recital poético titulado 'A outra Patria'.

Será unha das actividades que se desenvolvan con motivo do Día das Letras Galegas, que este ano se dedica á escritora Luisa Villalta. Con esta proposta, a UNED de Pontevedra quere invitar á reflexión sobre a lingua galega e sobre a migración como fenómeno socio-cultural en Galicia. Tamén busca potenciar o fenómeno dos neofalantes e xerar unha espazo de integración intercultural.

Durante estes días permanece aberto un "Punto de Interese" dentro do centro educativo. Neste espazo realízase unha aproximación á figura artística da autora Luisa Villalta e, ademais, manténse unha mostra de parte da bibliografía en galego coa que conta o fondo da biblioteca.

Esta exposición aberta conta coa axuda para a procura de bibliografía en caso de necesidade que achega o persoal do Centro a través de Pedro Manuel García Álvarez, Irene Montserrat Blanco Boullosa e José María Rodiño Barcia. 

Con esta iniciativa tamén se quere dar visibilidade á biblioteca na comunidade universitaria e publicitar parte da colección que non figura no catálogo da UNED.