【明報專訊】個人資料私隱專員公署上星期五（10日）起推出「關注私隱週2024」，以數據安全做主題，舉辦連串推廣同教育活動，加強機構同市民保障數據安全嘅意識。活動之一嘅流動展覽車「保障私隱號」噚日起一連兩星期停泊各區，向途經市民播放教育短片，市民仲可以上車玩有獎遊戲。
展覽車今日會停喺銅鑼灣百德新街，聽日就會轉去灣仔皇后大道東胡忠大廈附近，嚟緊亦會喺唔同日子到訪觀塘駿業街、尖沙嘴海防道、大埔廣福道等，詳情可以留意私隱專員公署嘅社交平台。
另外，公署下星期四（23日）會舉辦「資料外泄個案及數據安全措施分享」研討會，由私隱專員鍾麗玲同公署首席個人資料主任郭正熙分享近年資料外泄個案，講下當中成因及改善措施，仲會教大家點樣提升數據網絡安全、預防及處理資料外泄事故。