萬家燈火，總有一盞燈，是等待最後歸家的人。

        林保怡的媽媽，雖未能繼續為林保怡留下這盞燈，但她卻燃亮了林保怡一生：懷着善心，抱着誠懇，實事求是；做好人，做好事，走得更遠，飛得更高，發熱發亮。深愛母親的林保怡，深信終有一天跟媽媽重聚，在某個時空下，在海灘吹着風，吃着叉燒包，拖拖手來抱抱，再續未了母子緣。

        將迎來第17個沒有媽媽的母親節，林保怡說起媽媽時，幸福盎然，彷彿媽媽從未有離開過，聲音、觸感及味道，記憶猶新，42年的母子情緣，林保怡說，無悔也無憾。

甜蜜的母子情

       林保怡和媽媽的感情，甜蜜到不得了，以甜蜜形容確非誇大，先不說怎忙也總會抽時間陪伴，吃一碗魚蛋粉也特別開心；主動拖着媽媽的手、抱抱、親吻，就是這樣自然熱切的表達愛意，從未有怯懦保留，「爸爸媽媽係我嘅心肝寶貝，一直我畀佢哋最好嘅嘢。我係好珍惜同佢哋嘅每一日、每一分鐘。」林保怡說。

       林保怡眼中的寶貝，年紀愈大，愈像小孩，直至一天，才驚覺媽媽真的老了。有次他帶父母去德昌吃魚蛋粉，期間媽媽去洗手間，「平時佢去洗手間，我會喺出面等佢，當日佢去洗手間時，突然大叫：『我起唔到身！』推門入去，見佢向後跌低，冇力起身，我即刻扶起佢，當日開始，我更加覺得，要畀更多時間照顧佢！」

      「點解一個人好哋哋，突然間會係咁？我唔係好相信呢個事實，係好希望有一日做番正常老人做到嘅嘢，可以變返之前嘅媽媽。但係原來係唔得，人老咗，時間冇咗就係冇咗。我同自己講：『林保怡，你要接受！因為老人家係咁！』我要開始接受父母年老。」

等見最後一面

        看着雙親的身體機能開始走下坡，力不從心，林保怡更悉心照顧及關注雙親的身心，「我買輪椅畀佢哋，初時佢哋好怕，覺得畀人睇到唔好，又覺得自己唔係唔行得。我要同佢哋做心理輔導：『你唔係唔行得！而係歎世界！你坐輪椅，有人推住，不知幾舒服！』喺我愛心之下，佢哋係OK，仲讚張輪椅好靚，老人家好似小朋友咁，係要𠱁！」

       林媽媽晚年中風，行動不便，後期消化系統不濟，要插鼻喉輸營養。時為2007年6月，林保怡要到法國拍攝劇集《珠光寶氣》，離港前他來到媽媽的床前，親親她，拖着她的手，說要等他回來。林媽媽當時雖不能說話表達，但她守諾，等了一個月，待林保怡歸來，讓他握着手，慢慢遠去。時隔17年，這一幕，忘不了，林保怡說時，悲從中來，心頭一顫，嗚咽涕泣。

       「臨走前，我喺媽媽耳邊講：『媽媽，我要去法國拍戲，你要等我返嚟呀！』喺我拍完戲之後......佢真係等我返嚟...跟住...過兩日佢就走咗！係！佢真係等我返嚟！我仲記得落機返嚟，我話：『媽咪，我返咗嚟嘞！』見到佢好唔妥，我送咗佢去醫院，兩日後，佢喺我身邊走咗。佢好聽話，真係等我返嚟！佢係堅持住等我返嚟！我同媽媽有太多難忘嘅時刻，但呢一個係我最難忘。」

DIY Queen

         林保怡說和媽媽的情是刻骨銘心，深愛她，也佩服她，在她的巧手下，化腐朽為神奇。「媽媽係DIY Queen，好勁！以前我哋住舊樓，父親收入唔高，我親眼睇住，媽媽親手造咗好多嘢出嚟，例如用縫紉機車衫、褲、窗簾、房門嘅布簾，就算係木工都一樣得！就算冇錢買玩具，媽媽會用布碎親手縫豆袋畀我玩。雖然冇靚屋冇玩具，但我嘅童年係好開心。」

        「媽媽好叻煮飯，久唔久就整個蒸魚腸，煲杏汁豬肺湯。點解媽媽會識整呢啲功夫菜？我諗佢係喺街市問人，其實佢係一個好聰明嘅女人。」

         身教勝於言教，父母的舉手投足，一言一行，深深影響林保怡。「保持儀容整潔，係受媽媽影響。我同爸爸嘅恤衫，全部都係媽媽漿過熨過，熨到條領有骨，爸爸仲幫我用髮乳嚟梳頭。喺我未出世前，爸爸媽媽係着得好靚，着西裝旗袍，就好似《花樣年華》嘅張曼玉同梁朝偉咁，我有留低爸爸嘅大褸，設計好似YOHJI YAMAMOTO，媽媽嗰件褸直情好似COMME des GARCONS。」

         林保怡保留雙親的物品，不只大衣，還有爸爸媽媽的結婚戒指，珍而重之的存放在錦盒中。在林保怡和東周刊分享的這張照片中，打開了的錦盒，映入眼簾的，是林保怡跟父母綻放幸福微笑的全家福，盒中有一張寫着「Thinking Of You」（想念你）的心意卡，卡上畫了一對站在樹上的love bird，一對戒指巧妙的扣在樹上。

培植一顆善心

         受媽媽影響的，還有是培植一顆善心，做一個好人，以及對名利的價值觀。「細個時，媽媽會教我講英文，教我對人要禮貎，要誠懇。爸爸媽媽係好人，真係去行善，去幫助弱勢社群。細個同佢哋去街見到有人行乞，爸爸媽媽會畀5毫子我，叫我行過去畀人。爸爸媽媽真係去行善，去幫助弱勢社群，係佢哋話畀我聽要有善心。」

        「我對工作係好揀擇，就算拍廣告，都要係拍啲幫到市民嘅嘢，唔好成日叫人借錢（拍借貸廣告）啦，哈哈！唔好害人去借錢，我賺你少少錢，但啲粉絲因為我而去借錢，咁係咪害人呢？真係好多人會相信藝人，例如啲粉絲睇咗我套《妙手仁心》，真係走咗去做醫生；睇我部《隨時候命》，走咗去做飛機師。藝人影響力好大，所以要小心去行每一步。唔可以因為一時之利，害咗人就唔好。」

抽時間陪父母

        憑電影《白日之下》，林保怡首次角逐金像獎最佳男主角，雖然未有得獎，但已大獲全勝，贏盡好評和掌聲，更獲「民間影帝」及「無冕之王」的美譽。林保怡說，直至古天樂及袁詠儀宣讀結果前的一刻，都未想過要做定準備，擬定如感謝媽媽的致謝詞，認為能參與角逐已非常開心。

       「可以去到呢個大Party已經好開心，如果得獎，隨性講想講嘅說話；得唔到嘅，一樣戥人哋開心！如果要多謝，一定係古天樂，如果佢唔搵我拍，唔投資呢部戲，我都冇呢個機會。如果呢刻你叫我諗，我諗會拎個獎，去寶福山畀我爸爸媽媽睇，跟住再畀肥姐（沈殿霞）、籮記（羅文）、哥哥（張國榮）睇，每次我去寶福山，都會搵一搵佢哋，因為佢哋全部帶過我出埠，有請我飲茶食飯，佢哋真係對我好好。我覺得人要飲水思源，等於我今次返無綫拍劇，就算我有冇獎，都會返去無綫，因為冇呢個娘家TVB，真係冇我。」

        林保怡說演《白日之下》院長一角，的確心力交煎，要擺脫自己的正能量，去演繹充滿負能量的角色，吃力辛苦，但電影獲多個提名，並令大眾關注社會問題，一切都是值得的。「我唔係咁嘅人，但要做個『X街』，但做『X街』要做得好，因為古天樂畀呢個責任我，我做得好，先有人入場。今次做咗一件正能量嘅事，雖然院長好「X街」，但係林保怡做咗一件好正能量嘅事！」

        很多子女往往在種種原因下，逼不得已把親人送往護老院照顧，林保怡說子女們更需要給予關愛。「我欣慰嘅係，當年我好爭氣，攞視帝後，工作接踵而嚟，收入多咗，我係請咗兩個保姆照顧爸爸媽媽，冇諗過安排佢哋去護老院。但係我都明白喺現今社會，好多孝子孝女係因為家庭或工作嘅現實問題，係被迫送父母去，係冇辦法，係一個現實。就算去咗護老院，都要多啲時間接佢哋去飲茶，又或者係視頻，唔係講電話。每日畀5分鐘，好簡單，你要記住，佢哋係生你出嚟嘅人，冇佢哋，係冇你喺度。」

當父母去旅行

        雙親先後離世，林保怡只會認為這對心肝寶貝只是去了旅行，總有一天會再見重聚，再給媽媽抱抱，拖着她的手說：「我永遠愛你。」

        「我當爸爸媽媽去咗旅行，到我一走，就有機會見到佢哋，我哋一定會喺返埋一齊。如果見到，我會講：『I love you always！』我哋一定會喺返埋一齊！就算喺某個時空再見，我一定會好好照顧佢哋！我唔知嗰個時空，係咪要用錢嘅呢？如果係，就大鑊，要帶埋錢上去，哈！爸爸媽媽好鍾意海，我會帶佢哋去海灘，食叉燒包、蝦餃、燒賣，坐一日，就OK。我會繼續畀最好嘅畀佢哋，最好，唔係用錢去覆蓋，係時間，係陪伴。」

        能做爸爸媽媽的孩子，縱使天變地變，是抹不了割不下的緣份，父母和子女之間的相處方式因人而異，有快樂的，有遺憾的，人人背後都有一個故事，林保怡盼望的，是大家惜緣，珍惜和雙親相處的光陰。

       「如果同父親或母親有多年矛盾，又冇返去睇佢哋，你聽一聽我講，搵一個機會，飲餐茶，或者同佢哋講聲：『我愛你』。當然有啲父母可能比較難相處，但係都諗一諗辦法，因為，父母真係得一個。」

       「我希望大家聽到我呢一段真人真事，好好珍惜年老嘅爸爸媽媽。多啲時間去陪佢哋，因為佢哋係倒數緊，我哋仲有大把青春，所以要盡量陪佢哋。當佢哋話：『唔緊要啦！你去忙、去做你嘅事！』時，你忙完之後，係要立即返屋企，好好善待、去錫佢哋。我係會拖手、kiss佢哋面珠，呢個係愛嘅表現，話畀佢聽：你係好愛佢！呢個physical touch係最好嘅傳達方式。如果大家未試過，可以試吓親吻爸爸媽媽，睇吓有咩反應。初時佢哋會覺得好奇怪，但係十次之後，佢哋會習慣、接受，佢哋會好珍惜。」