葉子楣上靈異節目擔心招惹另類朋友 揚言有度身訂造角色會復出接拍

葉子楣Amy 呢日作客 梁思浩 主持嘅節目《直播靈接觸》，鬼片佢就拍得多，不過上靈異節目Amy都係第一次，佢話喺節目除咗講到自己想講嘅嘢外，仲聽到唔少師傅講嘅有用資訊，所以成件事對佢嚟講好好玩。

思浩話自己同Amy有共同朋友，但原來佢哋從來未合作過，思浩大讚對方係一個好有義氣嘅朋友，一個電話打過去邀請，對方就即刻答應，思浩仲話Amy係首次上靈異節目，內心點都有啲驚驚地。而Amy就話因為自己係拍戲嘅，所以見到廠景嗰啲都唔使驚，因為知道好多嘢都係假，但因為好多人同佢講，驚拍完啲靈異節目後會招惹到啲「另類朋友」返屋企，不過Amy話自己睇完思浩個節目，知道可以聽到好多資訊，所以就答應上嚟做嘉賓。

今集節目主題講狐仙，曾經喺電影中扮演狐仙嘅Amy，就曾經傳出佢拜狐仙嘅嚟增加魅力嘅傳聞，呢日佢終於可以開腔否認呢件事，仲笑言要話畀大家知，佢冇拜狐仙都一樣咁靚呀！喺旁邊嘅思浩都立即附和，仲反問有冇人可以好似葉子楣咁，keep到條腰21吋。

最近頻頻出現喺大眾眼前嘅葉子楣，就話而家嘅小朋友同媽媽級嘅觀眾都好鍾意自己，令佢覺得好開心。而講到節目中師傅曾講到Amy嚟緊呢一年事業仲會有一個事業高峰期，問到佢會唔會把握機會復出，又或者返嚟拍電視劇？Amy就話如果有人專登為佢寫個劇本，佢一定會有興趣，至於思浩更豪言雖然自己好耐冇拍劇，但如果Amy點頭拍嘅，佢都會答應演出呀！