身為「名二代」，被掛上的標籤自然不少，但現年二十六歲的曾昭令（Adeline），則無視自己是富商曾文豪的孻女、賭王女兒何超瓊的契女等身份，一心享受生活。出身顯赫的她，並沒有所謂的小姐脾氣，她爽朗健談，訪問中笑聲不絕，是個樂觀的少女。

「可能我係細女，所以由細到大，無論讀書抑或工作都無咩壓力，形成我嘅性格比較樂觀。而且我自細就受爸爸影響，好鍾意去旅行，我o依家一有時間同假期，就會約朋友去旅行輕鬆吓！」

零壓力環境下成長的她，崇尚自由，才能活出真正人生的色彩。

性格樂觀的曾昭令，雖然仍然單身，但其爽朗的個性，相信定必吸引不少男士的追求。

六歲的她已十分大膽，手持巨型龍蝦拍照。

顯赫家族

認識了曾昭令多年，她與其兩位姊姊昭怡和昭亮完全不同，甚少現身Ball場，她解釋說：「其實鍾意Digital嘅人都係比較宅男宅女，我都係其中之一。加上o依家我兩個家姐都有了小朋友，佢哋去ball通常九點前就走，但我要放工先去，去到佢哋都走咗，所以咪唔去囉！」

曾昭令的祖父是已故百億富豪福建華僑曾紀華，開設米廠起家，還有煙廠、印刷廠和藥廠，資產遍及中港台、馬來西亞和新加坡等地，家族顯赫。

在漢基國際學校畢業的她，十八歲便轉到美國的紐約大學（New York University）攻讀政治。「當年我揀讀政治，真係有諗過自己將來可以改變世界，我亦有諗過畢業後去unicef做。點知人愈大，呢個志願亦慢慢無咗。記得畢業後第一份工，係喺美國做傳訊，大約做咗一年就返香港。返香港後，我加入咗公關公司Ogilvy做公關，但做咗九個月左右，因為太辛苦，我又無做。」

直至一五年中，她終於找到自己真正的興趣，「加入了Mullen Lowe Profero公司，負責Digital Marketing嘅工作，一做就做到o依家，真係好開心。」

一五年，二家姐曾昭亮﹙中﹚在外地舉行婚禮，曾昭令﹙右﹚與大家姐齊齊現身祝賀。

一五年，與父親﹙左三﹚及兩位家姐、姐夫及弟弟合照。