郭富城生圖曝光　樹根頸排骨胸現晒形

藝人郭富城（Aaron）出道逾40年嘅佢，人氣高踞不下嘅同時，外貌及身形都猶如初出道時一樣弗到漏油，而近期忙於宣傳電影《臨時劫案》嘅佢，日前亦被網友喺社交網晒出段佢主動同粉絲打招呼嘅短片，只見毫無巨星架子嘅郭富城城，見到有粉絲伸手出嚟時，都會主動同對方拍手回應，親切舉動冧暈一眾現場粉絲外，網友更留言大讚：「身高真的不重要，那個氣質、氣場加上眼神，一米八男的都能秒了。」

而另一位網友則晒出段喺會場內同郭富城互動嘅影片，並寫道：「問郭富城伸手要『錢』是甚麼體驗？郭天王打工也餓了系列，一路狂吃！」只見郭富城同拍檔林家棟一齊派金幣朱古力畀現場粉絲外，肚餓嘅郭富城仲邊派邊食朱古力，表情仲認真和味，令人隔住個Mon都忍唔全想番一粒呀！不過，唔知郭富城係咪太急住吞落肚，似乎咀嚼時太大力，搞到「樹根頸」現晒形，但都絲毫冇影響到佢嘅靚仔樣，特別喺零濾鏡下仲有咁高嘅顏值，引嚟唔少網友激讚凍齡有道。