干拿迪傷出！高普解釋：跑多一轉就出事

利物浦喺歐霸盃16強大勝布拉格斯巴達，不過球迷最關心嘅係球隊傷兵問題，中堅伊巴希馬干拿迪下半場早段，疑似大腿肌肉受傷提早離場。領隊高普賽後派定心丸，稱預期呢位法國國腳可以候命對曼城，表示換人係預防性質。

高普賽後表示：「我唔知咩情況，佢行過我身邊嗰陣講，『我覺得如果再跑多一轉就會出事』，即係話佢依家應該冇問題，應該可以喺星期日對曼城上陣，但我真係唔知。」另一守將祖高美斯今場同樣半場被換走，高普就話無關傷患，只係畀佢休息。

干拿迪近年經常受傷患困擾，加盟利物浦頭2季只係踢咗29場聯賽，今季喺祖爾麥迪比重傷下，成為利物浦必然正選，但今季亦受過2次肌肉傷患影響，27場英超只有14次正選紀錄，佢健康情況下係華基爾雲迪積克嘅最佳中堅拍檔。