生於DJ世家的李澄（西瓜），母親林珊珊與舅父林海峰及林曉峰，都是做電台出身，從小被耳濡目染的她，畢業後亦跟上他們腳步，七年前加入商台由低做起。現拍住森美、小儀主持《早霸王》等電台節目的西瓜，直言不想與母親比較。

「會將我同媽咪比較，或者叫我加把勁追上媽咪嘅人，都係啲唔了解我同佢嘅人。媽咪嘅成功，係因為佢敢作敢為，而我野心一向都唔大，努力工作都係想買多幾個手袋，但o依家人大咗，（對未來）有啲壓力，想試多啲唔同嘅範疇，唔排除會喺幕前發展。」

兩個舅父於幕前都發展成功，西瓜有前車可鑑，想跳到幕前，更加如魚得水。

西瓜解釋「西瓜的由來」：「我聽講因為媽咪有咗我時個肚好大，好似一個西瓜咁有好多紋，所以由細到大都叫我西瓜。」

外貌和聲線都似足媽媽林珊珊（左）的西瓜，指母親從不干預她的電台工作：「可能佢唔想俾壓力我，始終我係佢個女，唔想俾私人感情影響到。」

怪聽眾恐嚇

一屋都是唱片騎師，與電台扯上關係也在所難免，不過西瓜直言，當年想擔任DJ，一切因森美而起。

「我細個成日聽電台，最鍾意聽《森美變態樂園》，小學嗰時佢哋好hit，好好笑，嗰陣已經同朋友約定要一齊做DJ。其後我入咗科大讀business，畢業後見到商台請人，打算入去做公關，以為無人會知我係邊個，點知原來個個都知！佢哋覺得我唔適合做公關，轉咗我去『天比高』幫手諗橋，直到公司想開一個新平台，我去學剪片同開咪，無啦啦俾人『的』咗我入去客串森美同小儀嘅節目，做做吓由客串變成日日都做，七年以嚟發展得very good，已經唔係so good咁簡單！」

手頭上有《早霸王》、《西瓜大發》、《在晴朗的一天出發——早安，同學早！》等電台節目的她，最怕做晨早節目。「我係一個好怕早起身嘅人，但偏偏要做七點鐘嘅節目。我每日六點起身，刷牙洗面五分鐘就要出門口，連妝都唔化，就衝去公司做節目，然後等到十點再開咪。中午我就要返屋企瞓晏覺，如果唔係會頂唔順、會暈同唔知道自己講緊乜。三、四點放工之後，就接主持同廣告錄音嘅job做，有時真係做到好攰，約咗朋友食飯都會發呆。」

開咪七年，西瓜直言積落不少中年男人粉絲歡心，提到去年有狂迷因迷戀商台DJ麻利，而襲擊另一DJ當奴一事，西瓜心有戚戚然，更大爆近日亦遇到怪聽眾威脅。

「瘋狂粉絲真係防不勝防 ，平時都有好多精神有問題嘅人嚟搵我哋，最近喺我Facebook fan page嘅inbox，收到有個聽眾留言話：『你唔應我，我就死俾你睇！』我睇到呢句說話唔係驚，而係覺得好嬲、好過分，我係唔會應佢。如果我應佢，即係助長佢，如果佢真係為咗呢件事而輕生 ，咁都好不智啫。我又無做過啲咩錯事 ，唔擔心會有粉絲襲擊。」

為吸納更多粉絲，西瓜每逢星期二都會在網上直播自家「Mask Tuesday」環節，一邊敷面膜，一邊與粉絲互動。「我好鍾意化妝美容，所以每次直播都會試唔同嘅面膜。」

與DJ男友朱穗傑拍拖五年的西瓜，在公在私日對夜對，她笑言感情依然穩定。