秋日森林採菇+正宗芬蘭桑拿
十月開始香港踏入秋季，係登高遠足嘅好季節。而芬蘭呢到，早係九月天氣就開始轉涼，樹葉亦陸續變得黃黃橙橙。呢段時間係芬蘭就最適合去森林國家公園健行，只無奈小編仲未有車牌。不過冇車又唔代表冇得去感受大自然，剛好有朋友係芬蘭參加完一個森林採菇體驗，覺得好好玩於是就介紹咗比我。經網上報名比錢後，就會收到當日集合時間同地點。
現時全芬蘭有40個國家公園，而今次我地就去Liesjarvi National Park，由市區出發車程要1個半鐘。係呢1個半鐘入面，我地嘅眼睛同口都非常忙，因為沿路一直都係黃黃綠綠嘅樹林，好有秋日氣息。對話得知導遊 Jeff 原本係加拿大人，遇上佢真命女神之後，就跟佢芬蘭女朋友移居赫爾辛基生活，最後仲係COVID前開咗呢間旅遊公司。
我地大概10點半就到達Liesjarvi國家公園。先聽Jeff講解一下今日採菇路線之後，我地就拎住藤籃，開始尋找野生菇菌之旅，然後就會到營地煮我地嘅午餐。Jeff先教我地分辨出今日要摘嘅主角 – 雞油菇，特徵係菌柄有橙黃色，係其中一種芬蘭人經常食用嘅菇菌品種，然後我地就分散尋寶。
▼秋日森林採菇
▼秋日森林採菇
▼秋日森林採菇
▼芬蘭野生莓
採菇就好似小朋友尋寶藏一樣，第一次去採菇，小編每見到一有野菌，就好似搵到寶藏咁超級興奮，就算係唔食得嘅菇，我都幫佢地拍咗好多寫真。不過除咗摘野菇之外，芬蘭秋天嘅森林仲可以採摘唔同種類嘅野莓，例如有Crow berry、Bog Bil Berry、Bilberry、Lingonberry。我地今次嘅收獲唔算特別豐富，但已經好夠我地三個人份量。
▼秋日森林採菇
第一次去芬蘭嘅國家公園，發現呢到比香港唔同嘅係，呢到有小屋同木材屋比人隨時使用。我地周圍玩緊嘅時間，Jeff就即場表演斬柴生火，然後煮芬蘭式三文魚湯、香烤菇配黑麵包。原來親手食返自己採摘同煮嘅食材，係特別好味！
▼即場煮野食
▼芬蘭式三文魚湯
▼芬蘭式三文魚湯
同森林講再見後，我都要急急腳去下一個地方，亦都係今次最期待嘅行程 – 焗正宗芬蘭式桑拿。咁辛苦採完黃油菇，當然要好好放鬆一下，今次揀咗間好受遊客歡迎嘅桑拿。 外貌係一間小屋既Löyly Sauna 座落於海邊，入面唔大，所以事前最好book定位。桑拿每日下午4點先開始。
▼焗正宗芬蘭式桑拿
換好泳衣、沖好涼之後就可以開始焗桑拿。焗桑拿冇咩準則，覺得太熱就可以休息完再焗過。Löyly Sauna係一個男女公聚浴場，入面有芬蘭傳統蒸汽桑拿同燃木桑拿2間桑拿房，而佢最大賣點就係可以行落海邊浸海水。如果唔怕凍嘅不仿可以好似小編咁，焗完10分鐘桑拿，再跑到海邊「過一過冷河」，浸30秒冰凍海水再跑返去焗桑拿。
▼海邊「過一過冷河」
來來回回三次，再行去休息區飲番杯冰水，休息完20分鐘再重覆做多次，包保成個身體一定會好快復原，黎到芬蘭點可以唔試正宗芬蘭桑拿 (聽聞 芬蘭人鍾意焗桑拿嘅程度，甚至去到公司開會都會去焗桑拿)
▼焗正宗芬蘭式桑拿
採菇體驗之旅
- IG ＠taigatimes
- 網站：https://taigatimes.com/helsinki-nature-tours/
Löyly 桑拿
- 詳情：https://www.loylyhelsinki.fi/en/ (19 €2小時，往後每小時10€)
小編出走遊記一覽
- #1 小編出走：疫情下的一趟旅行
- #2 小編出走：大鄉里坐飛機與入境芬蘭篇