人氣勁過姜濤？193新歌MV點擊3日破62萬

組合ERROR成員193（郭嘉駿）自從話「40幾歲仲後生仔？」，暗寸無綫節目《#後生仔傾吓偈》主持陸浩明年紀大後人氣急升，佢嘅社交網粉絲人數急增至34.5萬，比起近期Hit爆嘅姜濤仲要多6萬，一直想出Solo單曲嘅佢，近日喺《ERROR自肥企画》節目中，成功推出處男單曲《睡到三點》圓願，歌曲喺5月18日放上社交平台，至今已超過62萬點擊，一度成為熱爆短片榜首。

既然網上成績咁好，佢當然食住個勢將新歌派台，派台Box Set就用咗貼上自己扮綾波麗嘜頭嘅日本蒸眼面膜，受到少爺占、Oscar等DJ熱捧，仲獲讚可以入選十大最佳派台宣傳品。

帶挈保錡翻身

由於193人氣咁勁，帶挈埋ERROR早前播出嘅節目《花姐ERROR遊》和《ERROR自救TV》系列，成功喺網上翻Hit，令到本來疑因偷食沙律（張沛樂）風波，同失言爆粗鬧網民事件，而成為負評王嘅成員吳保錡（保錡），成功翻身，獲得網民原諒，而曾經同佢合作嘅阮小儀，仲留言鼓勵佢：「你係乖嘅，我知道！」

《ERROR自肥企画》令男團ERROR四位成員梁業（肥仔）、何啟華（阿Dee）、193、保錡人氣高企外，連格仔Mike導演（劉諾衡）都成功跑出，收納了一班「格仔餅」。最後一集入面，Mike表示由於節目嚴重超資，他需要承擔責任，與一眾團隊在會上致歉，Mike更硬食死亡行星，下體被擊中受害。點知193竟然爆料：「中咗佢呀，今日佢女朋友一定讚佢呀，大咗，又壯咗」。結果令一班「格仔餅」傷心欲絕，喺網上討論區連環開post，指「劉諾衡Mike BB被宣布有女朋友哭喪區！」等，並埋手向Mike女友大起底。對於戀情被曝光，Mike向外大方承認已有一位拍拖一段時間嘅女友，仲話同女友性格一凹一凸添，但佢就希望將感情事低調。問到會否擔心女友身份被曝光，佢就話唔會特別驚，仲笑指193只係爆人哋感情事，真係夠晒好兄弟。

不過，有網友發現ViuTV官網的《自肥》最終回不能重播，指被下了架。網民揚言「還我自肥計劃」！而有關方面則表示因機件故障關係，稍後會重新上架。