「金牌飯局」賀歲三部曲，嘉賓湧住出場，今次嚟到次部曲，更加大堆頭，我請嚟賀歲片《72家租客》領航人曾志偉，率領導演葉念琛、黃宗澤同葉翠翠，拉大隊到啱啱空降尖沙咀iSQUARE嘅「阿一海景飯店」，團住年講吓「租客」點滴。

相信你哋都感受到《72家租客》粒粒皆星嘅排山倒海攻勢，今晚我就要眾星講真心話！而為咗出名鬼馬嘅志偉，我仲安排神秘嘉賓踩場，炮製一個特別驚喜！

今晚有《72家租客》嘅精英共聚一堂，唔好好咁同我嘅好酒腳志偉暢飲，點得？

志偉最高決策

志偉係影帝級人馬，演技爐火純青，而且佢又身兼資深電影人，今次為《72家租客》再身兼導、演兩職，實在難得。「今次好多好朋友都非常幫手，就算戲份唔多，甚至只係過鏡嘅，佢哋都拍心口客串。其實賀歲片最緊要係帶畀觀眾歡笑，今次我就加多啲元素，拍一個同香港人冇距離嘅故事，都係一啲升斗市民嘅奮鬥故事。配合埋咁大堆頭嘅卡士，冇得輸！」

哈哈哈！有信心梗係好事啦！我唔講大家一定唔知，志偉一直係我嘅好酒腳，一向豪氣嘅佢同我一樣，杯杯乾，今晚亦唔例外，佢一斟酒就斟一大杯，認真畀面！而且佢一講新戲就眉飛色舞，滔滔不絕，有佢擔任飯局嘉賓，又點會有悶場？

「今次我同學友喺部戲係情敵，佢成日話自己拍戲只係兼職，但係佢一啲都唔知自己拍喜劇係幾咁有天份。而且有佢喺度，成部戲製作嘅凝聚力都大咗，我哋日日開工好似玩咁樣，上上下下都好有衝勁。

「拍電影係teamwork，一定要團結先可以做到好嘢，今次我哋就係上下一心為部戲，過程係令人回味嘅。」

志偉同我相交多年，佢自動請纓餵我飲湯，今晚靚湯係花旗參燉螺頭豬「月展」湯（最左圖），滋補潤肺。

志偉見到我嘅「天眼」，愛不釋手。

「五福臨門」係阿一為我哋炮製嘅佐酒雜燴，味味都啱口味。

遼參加花菇鵝掌嘅配合各適其適，啱晒今晚嘅嘉賓。

見偶像償素願

志偉係今次嘅領航人，佢同鍾澍佳、葉念琛齊齊為《72家租客》執導，3大導聯手，其中資歷最淺嘅葉念琛，一知道可以同志偉合作，未開工已經先興奮！

「志偉係我嘅偶像嚟㗎，我呢生人睇嘅第一齣賀歲片，就係佢導演嘅《最佳拍檔》，唔少情節到今時今日我都仲記得。要拍一部深入民心嘅作品唔容易，但係志偉就有多部入屋作品，所以今次一知道可以同佢合作，我就知自己可以學到唔少嘢，自然會特別興奮。」

哈哈哈！話就話葉念琛謙稱要向志偉學嘢啫，其實有另一位朋友靜靜地向葉導學習，佢就係喺戲中飾演志偉乖仔嘅黃宗澤（Bosco）嘞！」

鵝肝炒蛋白係中西合璧嘅fusion菜式，葉念琛（左圖）食到唔停得口！

「表哥」馬時亨（右）知我係威士忌嘅fans，仲專誠帶多支whisky嚟踩場。

呢隻脆皮炸子雞選用走地雞作材料，雞咪濃郁而且肉質滑溜。

表兄弟真上陣

你哋知道志偉同前商務及經濟發展局局長馬時亨（Fred）係親表兄弟，但係你哋未必知道，佢哋感情有幾咁深厚。當馬時亨知悉我會同「表弟」志偉飯局嘅時候，佢就堅持要為親情踩場，見一見「表弟」，於是我就成人之美，為阿Fred製造一個驚喜畀志偉。

表兄弟聚首一堂，志偉面對表哥馬時亨時仍保持一貫嘅鬼馬，仲大讚表哥keep得fit，哈哈哈！一家人果然係感情深厚！

自願OT增值

Bosco話自己拍一部電影可以滿足到幾個願望，「導演（葉念琛）嘅作品我睇過晒，今次可以由�