政情：評論員質疑：壹傳媒扮無力支薪 謀復刊保留資金

壹傳媒工會尋晚喺Fb刊登解散啟事，話隨住集團絕大部分香港員工喺今年7月1日已經離職，工會嘅歷史任務亦已經結束，會即將啟動解散程序，詳情稍後會再作公布。又指根據工會會章，會員必須係壹傳媒集團嘅員工，而工會現任理事會喺工會解散後，繼續義務跟進離職補償嘅問題，而該Fb專頁亦會喺短期內保留。

涉違國安法 被凍1,800萬元

時事評論員陳雲生分析話，事件變相反映有離職員工面對「有汗出、冇糧出」嘅情況，認為壹傳媒有責任向員工同公眾交代確實情況，而唔係將責任推向政府。陳又話，壹傳媒至今未有確實交代資金情況，變相提供藉口畀其他個人或團體，有機會假借協助壹傳媒員工名義，發起「眾籌」去漂白「黑金」。

之不過，陳雲生特別強調，壹傳媒被保安局凍結嘅資金只有1,800萬元，但睇番集團過往公布嘅財政狀況，質疑係咪真係冇錢出糧，反而係要留低部分資金，密謀他日東山再起。佢特別提到工會喺解散啟事中，其實變相係暗示有部分壹傳媒員工仍未離職。

壹傳媒被指涉嫌違反《港區國安法》「串謀勾結外國或者境外勢力危害國家安全罪」，警方國家安全處上月起採取行動，先後拘捕7名高層同員工，而保安局亦凍結壹傳媒3間公司合共1,800萬元資金，《蘋果日報》及後宣布停刊。