Häagen-Dazs×利東街 玩夏日派對歎限定雪糕

炎炎夏日，最好就係食下雪糕消暑啦，如果有埋Party玩就更加錦上添花。黛安聽公關姊妹講，Häagen-Dazs下星期六（19日）起，將會去到灣仔利東街舉行一連10日嘅Häagen-Dazs×利東街「Nothing Can Be Cöoler夏日雪糕脆筒派對」，到時唔止有雪糕食，仲有大型甜筒打卡位同歌舞表演、互動遊戲等，最啱一家大細齊齊參與！

去Party又點少得影相打卡，黛安知道，活動期間利東街將會搖身一變，成為派對嘅舞台，好似中庭會有一個7米高嘅發光雪糕杏仁脆筒懸掛高空，地下就會有色彩奪目嘅雪糕櫃裝飾，同埋粉紅Café、大型壁畫等，影完相即場上載到Instagram兼加上指定主題標籤，仲可以免費打印張相出嚟，留住美好回憶。

姊妹仲話，現場有唔少嘢玩，好似有「Cooler啦夾夾機」遊戲，只要去利東街商戶即日單一消費指定金額，就可以玩一次，有機會獲得Häagen-Dazs雪糕杏仁脆筒或者其他豐富獎品；周末期間仲可以參加DIY製作專屬布袋，兼睇本地舞團UNDERDOGZ同埋有創作歌手劉蘊晴獻唱，節目非常豐富。

黛安仲知道，Häagen-Dazs更聯同利東街多個商戶推出優惠，好似Nail Bar就用咗雪糕杏仁脆筒為主題，特別設計咗「甜美呍呢嗱」、「清新抹茶」同「濃情朱古力」3款夏日必備Gel甲，推廣期間惠顧仲有免費雪糕杏仁脆筒送畀你，扮靚靚之餘亦可同步歎雪糕。

有興趣參加嘅朋友，記得今個月19日至28日，去灣仔利東街感受下夏日風情，食住雪糕玩遊戲、聽音樂喇！