【東莞直擊．有片】細細粒生日想出寫真 阮兆祥：粉紅乳豬值得睇
撰文：鄺鈺瑩
出版：更新：
細細粒於祖藍的演唱會上又跳又唱。（鄺鈺瑩攝）
好想出寫真的細細粒，在後台不停擺甫士，結果被阮兆祥笑她似肚痛。（鄺鈺瑩攝）
細細粒（陳嘉佳）昨日32歲牛一，雖然要到東莞為王祖藍的演唱會擔任嘉賓，但她表示幾乎年年生日都在工作中渡過，更指藝人愈忙代表愈紅，所以不會特別要求生日放假。問她可有送什麼禮物給自己，她聲線即時轉變，細細聲講：「唔可以再送禮物俾自己，因為呢個幾乎係經常性，目前大概係用到500歲的quota。」由於太鍾意shopping，所以細細粒坦然沒有儲蓄習慣：「都擔心，所以今年目標係要儲錢買樓，做女版祖藍，成為樓王！」
接著她說前天彩排時，有向老闆王祖藍提及過要出寫真集，但完全被無視：「人哋日本渡邊直美都出啦，我出半裸寫真都得，唯一要求係想搵張叔平做美指。」記者訪問時剛好經過的阮兆祥聽到即表示一定會支持，但說罷又似乎想反口，連他自己也忍不住大笑：「你諗諗……真係可遇不可求，粉紅色孔豬，絕對唔會輸。我覺得每個男人睇完佢本寫真之後，都會覺得自己老婆好正！」向來是扮嘢高手的祥仔，更即場向細細粒示範寫真甫士及表情，可惜細細粒做極都唔似，令祥仔頂唔住話：「你肯影我肯投資，我出錢去燒書。」雖然被笑指唔掂，但仍然打擊不了細細粒的信心，更表示已經搵定參考資料，各位敬請期待。
細細粒同祖藍的「床上戲」，絕對適合任何年齡人士觀看。(鄺鈺瑩攝)
演唱會上，身穿假露肉裝的細細粒，以女皇姿態被6名老外dancers抬住出場，然後大跳容祖兒的《隆重登場》，霸氣十足。而唱《Take My Breathe Away》時，身穿黑色透視裝的王祖藍躺在床上現身，一個唱一個扭，最後細細粒更撲到床上，祖藍成個彈起，場面搞笑多過香豔。表演完後，王祖藍與黃光亮捧出鮮花及蛋糕，並帶領全場觀眾唱生日歌為細細粒慶生，令壽星女感動非常。
王祖藍與黃光亮齊齊為細細粒慶生，俾個驚喜佢。（鄺鈺瑩攝）