《權力遊戲》（Game of Thrones）第八季終極大結局鐵定香港時間四月十五日面世，跟去季一樣，由於劇集內容已超越原著小說，情節將會完全原創。如果不相信所謂黑客盜竊出來的劇本，暫時只能倚賴官方宣傳片和演員發表過的訊息估計結局發展。線索有限。值得注意是《權力遊戲》（Game of Thrones）第八季只有六集。去季共七集，已經被垢病節奏過份急促，虎頭蛇尾，今季篇幅更短，如果情節仍然複雜，恐怕會落得爛尾收場。以下是大膽預測，純單方面預測，正常，如果我說我估得到《權力遊戲》的內容，你會相信？
登入 瀏覽本網站，可獲取積分換領專屬優惠
點擊查看專屬優惠
《權力遊戲》第八季冷門劇情一：打人先定打鬼先？
上集結局，已經預告Jaime頂唔順Cersei，將會棄暗投明，跟龍女大隊打白鬼。換句話說，至少有兩場戰役要打，一場是龍女一方打白鬼，另一場是龍女一方打Cersei與黃金團。正常來說，應該係正派先打白鬼，死剩種再跟執死雞的Cersei硬拼。
但白鬼是由第一季開始鋪排的伏線，壯烈程度應該史上最強，不留來壓軸搞到全人類死晒，何來震撼力？所以，有可能係Jaime做二五仔，龍女先帶隊跟Cersei過一招，先跟白鬼來一場終極大戰，咁就符合《權力遊戲》估你唔到的傳統。
《權力遊戲》第八季冷門劇情二：邊個唔使死？
正常來說，應該所有角色死清光才似《權力遊戲》。總有分先後。大膽推測Brienne重遇心上人Jaime後，可以火速獲得一個安樂死。Theon從阿叔Euron手上救走家姐後，也可以安心同歸於盡，配角死得七七八八，就輪到主角，先死龍女和Jon Snow其實最合理，尤其二人已上過床，順理成章可以留低龍種。
故事一直鋪排Arya是復仇勇者，由Arya親手殺死Cersei最可以呼應第一季Ned Stark之死。主角只需要留低Tyrion就夠，他是出現集數最多的角色，他才是真真正正的男主角。
《權力遊戲》第八季冷門劇情三：誰人最後坐上鐵王座？
咁係咪代表會由Tyrion坐上鐵王座，成為終極贏家？又唔似，Tryion一直以來都係擔當軍師角色，各方勢力都有少少身份，真正身世仲可能連龍族都關事，由Tyrion贏出，好似太過正路，未免不夠過癮。
由幾位主角贏出的話，都一樣。還有甚麼未死的角色坐上鐵王座會製造到驚喜效果又合情合理？首選Bran Strak，自從得到預知力量，已經超凡入聖，分分鐘是最後擊退Night King的最後武器，坐上鐵王座也具備說服力。
不過，說他是下一代Night King，可能更合理。一個神，才不屑跟凡人爭鬥。說起凡人，Samwell Tarly是最平凡的代表，但一路以來跌跌撞撞做過好多英雄事蹟又保得住條命，由他得到最後勝利，看似離譜但其實又最有意思。善良好人贏取所有，一反《權力遊戲》潛規則，最符合《權力遊戲》潛規則。