StarTalk一氣呵成版丨吳家麗由性感女郎變慈母 任達華讚敬業：係一位真正演員

任達華、吳卓羲、 陳紫萱 Summer Chan 同 張建聲 Justin Cheung 主演嘅電影《源生罪》，想帶出人與人之間溝通嘅重要，呢日佢哋就作客《StarTalk》接受主播 王鎮泉 Jeoffrey 訪問，當中吳卓羲指現今社會大家都只靠訊息嚟交流，少咗面對面以言語嚟溝通，佢覺得僅以文字嚟對話，始終會少咗語氣語調同情緒，而《源》片正正就係想帶出用說話交流嘅重要。

任達華亦提供促進大家關係嘅方法，佢指即使大家住喺香港唔同地區，都可以透過手寫信同postcard，以手寫文字嚟傳遞思念，華哥話：「通過呢樣嘢，除咗科技上嘅溝通外，間中拎嚟睇一睇親手寫嘅嘢，呢個回憶就永遠喺個心入面。」

提現實生活中吳家麗視任達華為男神，但偏偏今次喺電影入面對方就要演華哥嘅媽媽，對此華哥大讚對方係真正嘅演員，指對方可以享受演出母親嘅角色，華哥又指吳家麗係一個無可複製嘅性感女郎，無論眼神定動態都係無可複製，華哥話：「呢個女仔做我阿媽，你諗下我哋要掉低幾多嘢！」亦因為咁令華哥對吳家麗相當佩服，指對方係一位真正演員而唔係明星。

對於電影喺多個外國影展獲獎，任達華指絕對係一個肯定，同時張建聲與吳卓羲又調侃陳紫萱奪「最佳女主角」後信心與氣場都有所改變。陳紫萱坦言首部演出嘅電影就可以入圍影展兼得獎相當開心，而如願與任達華合作嘅吳卓羲，就指自己一直好欣賞對方，而喺合作後發現對方另一面，相當值得學習。

#StarTalk #源生罪 #任達華 #吳卓羲 #陳紫萱 #張建聲 #王鎮泉 #一氣呵成版 #吳家麗 #溝通 #性感女郎 #影展 #最佳女主角