記得茱莉亞羅拔絲有一部電影叫《再單身遊記》（Eat Pray Love），內容講述一名女子放下工作，四處環遊世界，到不同國家體驗當地的文化生活，賺取難忘經驗。

嘉頓新抱張王幼倫長女張詩賢（Amanda），就過了如電影情節般的生活，二十五歲已到訪超過二十個國家，十二歲開始每年暑期到處兼職打工，為的就是跟茱姐一樣——體驗人生。

「我父母成日同我講，唔好以為可以印印腳，喺香港乜都唔使做，如果對社會冇貢獻，就唔好返嚟香港，所以我去咗英國同法國讀書後，年年去唔同地方打工，搵自己嘅人生目標，希望學有所成後，再返嚟回饋社會！」

體驗人生，所賺的未必只得經驗，保持初心，才是張詩賢「見習」的精髓。

小時候學過空手道的她，笑言當時相當男仔頭：「細個每年暑假都會去英國玩兩個星期，我好鍾意爬樹，日日都揀着褲，如果媽咪逼我着裙，我仲會喊！」

一二年，Amanda於劍橋大學畢業，舉家到英國賀她，當年我亦有份參與她的畢業典禮。

去年於巴黎高等商業研究學院（HEC）碩士畢業後，Amanda講得一口流利法文。

現已回法國生活的她，表示不會於法國長期定居：「我想喺法國工作幾年，學吓嘢先，但我點都會返嚟香港，香港永遠是我家。」

麥當勞受辱

誰說贏在起跑線，就可以一步登天？於劍橋大學經濟系畢業，再到巴黎高等商業研究學院（HEC）供讀碩士的張詩賢，父親是心臟外科醫生張力正，母親是Carnet珠寶設計師及領賢慈善基金主席張王幼倫，無論學歷還抑或背景都勝人一籌。她更早已踏足社會，於十二歲開始每年到處打工，無疑比人先行很多步。

「媽咪話我哋比人幸運，應該要體會吓其他人嘅生活，唔好以為自己好叻，用有色眼光睇人。十二歲嗰年，佢就安排我喺一間公司做打雜，斟茶遞水、做photocopy（影印）；之後又去過四季酒店捧餐，又喺麥當勞做收銀、炸薯條，大個啲就去咗做sales，所以我幾乎乜工都做過。」

父母無安排張詩賢於大公司做，反而統統由低層做起，張詩賢指，五年前暑期於麥當勞打工，受盡同事白眼，又被顧客侮辱，令她體會最深。

「我一向好奇心重，媽咪就安排我去IFC間麥當勞做嘢，本來都好期待，返工第一日，啲同事見個經理好似同我好熟，就覺得我有人照住，無人肯過嚟同我講嘢，甚至無人肯理我。

「另一件事係，當時我返早上七點，好多人邊食早餐邊睇免費報紙，通常啲人睇完都會唔要，咁我就集齊一疊攞去回收，點知有個OL走咗十分鐘後，返嚟問我佢份報紙喺邊，我心諗大鑊，我已經將啲報紙group埋晒一疊，佢就好嬲咁喺一疊報紙嘅中間，好大力抽起咗一份，令全部報紙飛晒落我塊面度，仲頭都無回就走咗。我嬲到塊面都紅晒，但只可以自己吞咗啖氣。我仲試過畀大陸人指住鬧我英文差，真係得啖笑，所以我做咗幾個星期就無做。」