娛樂圈啲男男女女成日傳緋聞，好多時緋聞男女仲會同場出現，不過未必會係嬲爆爆嘅場面，一樣可以好開心。黃宗澤（Bosco）同岑麗香呢對最新緋聞男女，前晚同鄧紫棋（G.E.M.）、林欣彤、側田、林子善同黃心穎等人喺將軍澳電視廣播城錄影無綫《超級無敵獎門人終極篇》，同場仲有同香香傳過緋聞嘅錢嘉樂，唔怪得主持之一嘅阮兆祥都問香香：「你嘅新歡舊愛今晚喺一齊，你覺得點？」
緋聞男女Bosco同香香前晚喺將軍澳電視廣播城錄影節目，Bosco向「女友」香香反白眼，認真冇面畀！
Bosco指杏兒係舊聞
緋聞俾人擺上枱，鬼妹仔香香好醒目扮嘢：「唔明，你再講一次。」其他主持都唔放過香香同Bosco，林曉峰又玩讀詩：「舉頭望嘉樂，低頭望麗香。」甩咗身嘅嘉樂都玩埋一份：「忠忠直直，宗澤乞食！」俾人咁玩，Bosco同香香似乎有啲尷尬，主持又叫佢哋四目交投，香香又重施故技：「呢啲四字詞我唔識！」不過主持都逼Bosco同香香對望，Bosco扮晒嘢反白眼，笑到鬼咁開心：「上嚟梗係開心，唔通喊咩！」結果香香玩遊戲時係咁輸，仲累隊友過唔到關，嘉樂都笑佢：「陀衰家。」
香香玩火咁危險，錢嘉樂乘機望實。
G.E.M.食相嚇人，加埋坐姿豪邁，嚇窒Bosco！
問到Bosco係咪好快又返內地搵人仔？佢話唔會住，因為嚟緊要拍新劇。講到俾人玩，Bosco話預咗：「冇所謂，緋聞又係假。我最初仲以為係同劇集《貓屎媽媽》啲演員上嚟玩。」講開《貓》劇，有傳Bosco唔妥胡定欣介紹男仔畀舊愛胡杏兒識喎？Bosco否認：「邊有呀？合作好好，好friend！我仲原本今晚約佢食消夜。」如果胡定欣真係介紹男仔畀杏兒，嬲唔嬲先？Bosco話：「好嘢梗係多人爭。」咁你會唔會爭番？Bosco話仲問呢啲舊聞就冇新意，又話同香香冇可能。
版主：陳基征
黃心穎着低胸裝玩遊戲，真係聰明㗎啫。
側田除帽晒光頭，o氹到林欣彤笑晒。
from:
http://hk.apple.nextmedia ... 130814/18377375
