【A&M Diary】作為傳統工業區嘅觀塘除咗有大量茶餐廳之外，近期仲開咗一間全新嘅打卡名店：Be Leaf。今日A姐就約埋喺附近返工嘅姐妹團放lunch打個卡啦！Be Leaf分為打卡熱門嘅室外部份同室內區域，我哋就揀咗室內，除咗坐得舒服啲，更重要係室外對住大馬路，人多車多，其實都幾大塵囉！
美國天然豬扒配松露菌蘑菇汁
豬扒厚切，不過就偏瘦，所以肉質較實較嚡，但相對就會食得健康啲。伴碟嘅薯餅反而係超好味，薯餅炸到脆口，入邊嘅薯蓉超軟綿，薯味香濃，好好味！其他伴碟仲有車厘茄、薯蓉同菜。整體份量十足，絕對夠飽。
