【新手買車攻略】買二手車流程＋注意事項

July 19, 2022

香港嘅交通雖然方便，但撞正返工放工時間，望住啲人動物大遷徙咁逼上地鐵，或者追巴士追到就斷氣，就不禁心諗：「有自己㗎車就好……」。基於經濟因素或揸車經驗唔夠，好多人會考慮買二手車。對新手嚟講，要諗買咩車，又要辦理各種手續，真係頭都大。跟住呢篇攻略，快睇買二手車嘅流程和注意事項，避開中伏位！

一眼睇晒【買車六大流程】幫你買到心儀嘅二手車：
揀車 >> 睇車 >> 驗車 >> 支付訂金及簽合約 >> 購買車保 >> 交車、支付尾數及轉名過戶

↓↓↓↓↓↓↓↓↓↓↓↓↓↓↓↓↓↓↓↓↓↓

🔍第一步：搵心水車盤

做人最緊要知道自己想要乜！與其海底撈針，不如花多啲時間喺搵車之前了解清楚自己嘅dream car，再配合預算，根據設定好嘅條件尋找心目中最理想嘅車種！

一般可以按照車廠、型號、保值能力和年份等條件去揀車。預算較多嘅朋友可以考慮牌子較奢華但維修費用普遍較貴嘅歐洲車款，如BMW和Audi；而預算唔多嘅朋友則可考慮較經濟實惠且慳油慳牌費嘅日本車款，如豐田Toyota和本田Honda。至於唔打算長揸嘅朋友則可考慮較保值嘅二手車，例如係油費較便宜，所以較受歡迎嘅柴油車和低cc車。

想搵車盤有好多方法，其中兩大途徑係正規嘅二手車行以及網上二手車網。二手車買賣平台上嘅車盤有兩大類，一般歸為車行經紀放盤同私人放盤。車行經紀會提供保養及售後服務，買咗車後遇到問題都可以搵返佢哋幫手，而私人車盤一般唔提供此類服務。搵車記得要留意行車里數（20萬里以上嘅話維修費會較貴）、排量、油耗、首數（汽車轉手次數）同有冇原廠保養紀錄。

更多星級商戶二手車推薦>>
搜尋更多二手車>>

⚠️搵車注意事項

搵車時要多加留意汽車嘅背景來歷，例如賣家點解要出售，以及汽車有冇試過發生嚴重事故。水貨車中特別多來歷不明嘅「化妝車」，要仔細向賣家詢問清楚或要求入口文件，睇真啲，咁就萬無一失啦。
如果擔心買完車後遇到難題唔識拆，可以喺搵車時選擇有信譽、認證或品牌嘅正規二手車行。如果想經網上車網搵車，最好搵返信譽良好嘅車行經紀，咁樣嘅話買車後都可以有售後保障服務。
近年有新聞指部分車行經紀會假扮私人放盤，藉此唔提供售後保障。如果想喺二手車網搵私人車盤，就要多加留意車行放盤中有冇近似嘅車盤，避免受騙或受損失。
搵車嘅時候唔好淨係睇車價，要綜合晒所有資訊再推算養車成本，因為就算車價平，養車成本都有可能比車價貴。如果唔想之後負擔太大，最好就喺搵車階段時好好衡量成本啦。
無論喺邊度搵車都好，最忌衝動行事，最理想嘅做法係先到各大APP或網站查價格價，睇多啲相似嘅車盤先做決定。

🔍第二步：睇車

如果搵到一㗎符合條件同需求嘅車，就可以約經紀或賣家出嚟睇車了。

睇車嘅時候除咗要睇㗎車有冇照騙，同時亦要睇埋汽車裡裡外外嘅狀況，無論係車身外觀、車箱內、車件定係零組件生產日期，都要金晴火眼地check清楚。呢一步係買二手車過程中嘅重中之重，做好呢一步，就可以買到㗎心水車啦！

⚠️睇車注意事項

現場睇車嘅時候，可以首先檢查車身外觀，留意車身有冇刮擦，睇睇顏色有冇明顯差別，又或係頭尾冚有冇翻噴。
要檢查車件是否運作正常，例如係引擎、波箱和冷氣有冇問題，以及車燈和雨刷係咪運作正常。通常肉眼檢查嘅話未必發現到引擎和波箱嘅問題，買家如果想睇下呢啲地方行車時會唔會發出怪聲，不妨禮貌地問下經紀或賣家可否試揸（基於安全考量，有啲賣家未必會願意俾買家試）。
想之後再轉手嘅話，可以留意車身有冇噴油。如果㗎車有好多噴咗油嘅地方，日子耐咗就較容易氧化啞晒色，對㗎車日後嘅定價有影響，唔太保值。
有啲銷售手法不良嘅經紀或賣家會故意造假，隱瞞問題，睇車嘅時候可以對比下車籍資料（例如車型、年份、引擎號碼、廠牌和車身號碼）同實際嘅車況資料（例如車況檢查表同認證書），睇下兩者是否一致，經紀或賣家是否值得信任。
有一部分二手車賣家為咗賣得出，會撥咪錶，將行車里數調低。其中一個檢查方法係檢查車箱，一般情況下行車里數低嘅話，汽車座椅、零件裝飾和方向盤都會傾向較新，磨損較少。如果汽車有磨損，而行車里數卻好低嘅話，就有可能被撥咪錶了。
如果之前未試過買車，可以請對汽車熟悉嘅親友陪同睇車。
Check還check，買家同賣家之間都要互相尊重，睇車之前可以留意一下賣家有冇表明謝絕驗屍官或直版任驗。如果預算較低，建議可以盡量將就，唔洗太過執著於一啲小問題上。

🔍第三步：驗車

擔心齋憑肉眼睇車唔夠穩陣嘅話，可以考慮搵第三方驗車機構、車房或上門驗車公司為你進行仔細專業嘅驗車服務。師傅會觀察汽車有冇大問題或者邊度有維修過，從而提供中立嘅專業意見。

⚠️驗車注意事項

驗車呢一個步驟唔係必須要做嘅，一般驗車服務為千幾至二千蚊，買家可以衡量評估車價與驗車服務嘅費用，睇下需唔需要此項服務。
如果師傅表示需要更換較多嘅零件或損耗品，買家可以衡量車價同換件費用，睇下需唔需要同賣家議價。
如果有打算驗車，最理想嘅做法係等驗完車先同賣家議價，咁議價嘅時候就可以根據驗車機構嘅專業意見同憑據去評估價格折扣。

📝第四步：支付訂金及簽臨時汽車買賣合約

如果二手車狀態良好，亦都傾好咗價錢嘅話，咁就可以成交啦！俾好訂金，簽署臨時汽車買賣合約嘅時候，記得要謹慎地睇清條款，以防中伏或之後發生爭議。要注意即使簽咗臨時合約，過戶交車前如汽車有任何違規或糾紛事項，全由賣家負責。

⚠️驗車注意事項

一般會收取車價1-2成嘅訂金。
要注意合約需要寫明型號、底盤以及引擎號碼等汽車資料。

📝第五步：購買汽車保險

簽完約真的很興奮！興奮還興奮，千奇唔好忘記要買汽車保險啊。按照法例規定，買家（即新車主）需要喺過戶之前完成購買汽車第三者責任保或綜合保險（全保）。買家要問賣家攞車輛登記文件(牌簿) 副本，然後向合資格嘅保險公司申請車保報價和臨時保單（Cover Note）。一般而言，臨時保單有效期為30日，保單生效後60日內將發出保單正單。