熱戀時期嘅情侶總是愛得轟轟烈烈，山盟海誓話要愛對方一生一世，什麼「只愛你一個」呢類肉麻情話簡直百聽不厭。但到頭來，你會發現原來分手可以來得十分簡單輕易，由糖黐豆變成陌路人可能只係一晚嘅事。雖然分手比想像中容易，但我明白分手後遺症會伴隨你一段好長嘅時間。如果你正處於呢個階段，希望分手康復手冊呢7點可以將你從分手嘅陰霾中拯救出來。
登入 瀏覽本網站，可獲取積分換領專屬優惠
點擊查看專屬優惠
1. 大哭一場
無論你平時係一個幾堅強、幾獨立嘅人都好，經歷分手所以哭得死去活來都係一件可以理解嘅事。如果想哭就盡情地哭吧，就算你係一個唔感性，平時好少喊嘅人都好，經歷分手係一個好好嘅藉口俾你將所有負面情緒一次過爆晒出嚟。大喊一場，將負面情緒抒發出來先可以計劃下一步。
2. 找朋友傾訴
或者你係一個唔鍾意同朋友分享生活大小事嘅人，但閂埋房門自己一個喊只會令你康復嘅時間延長。好似傷風感冒咁：你唔理佢，佢或者自然康復，但如果你肯去睇醫生，康復嘅速度通常會快啲。搵一個可信嘅朋友，讓佢好好分擔你嘅傷心同憂慮；同時，讓佢好好開解你。你會發現到頭來最可信最唔會離開你嘅並唔係男朋友，而係好朋友。
3. 去一趟一個人的旅行
離開香港呢個傷心地：揀一個你想去嘅地方，然後買一張只屬於你一個人嘅來回機票，去一趟說走就走的旅行。一個人隻身去外地闖：有問題要自己解決、行程要自己策劃、迷路要自己搵路。一個人的旅行，就享受一下自由自在嘅感覺吧，你會發現其實自己一個出走其實也可以很快樂。
4. 把自己的日程排得密密麻麻
將日程排到好忙絕對係分散注意力嘅好方法，忙著別的東西就無空閒時間胡思亂想，時間亦都會過得好快。唔一定要寄情工作嘅，可以去做運動、睇下書、出席一下朋友嘅聚會、參加一啲興趣班，再唔係執下屋佈置一下睡房。將schedule有咁滿塞咁滿，總之有嘢做個人就唔會亂諗嘢。
5. 不要再跟對方聯絡
與其優柔寡斷仲掙扎緊可唔可以「再見亦是朋友」，倒不如灑脫咁將一切可能性都刪掉。我明白呢個過程一開頭十分痛苦：嗰一個事無大小你都會搵佢嘅人突然變成生命中嘅過客，但係，徹底斷絕來往絕對係最快同最奏效嘅方法讓你好好把他放下。所以，就狠心地將二人的聊天對話刪除，將社交平台封鎖，將這個陌生人從你的好友名單中連根拔起吧。
6. 不要接觸失戀情歌
黃子華都話「失戀唱情歌等於漏煤氣閂窗」，除非你係天生被虐狂，如果唔係我諗你都唔想不斷勾起痛苦嘅回憶。情歌同愛情電影呢啲好大機會會同你有共鳴嘅嘢，唔係話以後唔睇，但可以過一排先再睇或者再聽。如果真係好想聽歌，可考慮聽一啲外語歌：韓文日文甚至泰文呢啲，有melody得嚟你聽唔明佢講咩，咁就唔驚聽聽下歌喊啦。
7. 重新出發
最好忘記上一段感情嘅方法莫過於開展新一段感情，千奇唔好為一棵樹放棄一個森林。調節好自己嘅心情之後，就重新出發吧。
但講到底，要完完全全從失戀康復最終都需要靠你自己。雖然啲人話時間可以沖淡一切，但如果你唔願意放低，再長嘅時間都係無用。睇開啲啦，「仔死仔還在 下過更可愛」，希望分手康復手冊呢7點可以陪你渡過失戀嘅煎熬～