【分分制勝】好拍檔的奇怪現象！

剛周日婦女銀袋賽馬日，潘頓連環搏失「美麗同享」及「永遠美麗」，幸好尾場夥拍「美麗宇宙」一放而回，總算為主人家贏馬贈興。「永遠美麗」1.5倍全熱門死火，潘頓攞位眼冤，明贏變敗，難辭其咎，若鞍上人換轉是莫雷拉，相信更會被人鬧足3日3夜！另一奇怪現象是，潘頓每次遇上賀廐「好拍檔」，發揮兩極化，「好拍檔」今季復出贏馬，同場潘頓坐騎「年少有威」忽然搶放敗北；「好拍檔」跟前贏完，翌仗留到包尾跑，潘頓胯下「包裝必勝」擺前輕勝；這次「好拍檔」重新入Ｑ，輪到潘頓馬匹跑得差。

回說今期戰線，第3場四班1650米，「世澤歆星」服役以來跑過12次，取得4亞2季4殿，一再接近，卻始終與頭馬無緣，今次續由冠軍騎師潘頓掛帥，抽排黃金1檔，論態亦無懈可擊，絕對有機會爭取打開勝門。但值得留意的是，潘頓與丁冠豪自從於去年10月17日攜手勝出「糖糖幸運」，之後一連8匹大熱門都無一取勝，當中「世澤歆星」已3度搏失，今次賠率亦肯定燙手，希望不要再令捧場客失望吧。

同場鄭廐的「勁叻仔」亦曾是屢拚無功之馬，直到上季尾終由莫雷拉打破悶局，輕勝五班谷草2200米賽事。踏入今季戰力更上層樓，先於40分取得跨季孖寶，前仗再於46分奪亞，步向穩定期。至於上場屈居第7，主要是受制於外檔形勢，被迫留到後列再衝，雖然三甲不入，但末段造出22秒53，時間居然比該仗慳盡贏馬的「友港友笑」更快，變速能力凌厲，確認這匹5歲拍賣馬仍具上升空間。

「勁叻仔」今次再爭谷草1650米，移至5檔起步，早段可免過於落後，加上今場有子彈快馬「胆大威猛」增程上陣，步速一定扯得很快，對參戰各駒氣量要求有所增加，「勁叻仔」一早有長途比併經驗，鬥氣鬥力絕無難度。此外，「勁叻仔」上周六安排與「帥男」及「勝利鐘聲」拍跳，加強打磨，該課中間竄上，反應理想，保持勇健。以最佳水準迎敵，有權再次攻破四班。

■明治朗