干地第1簽接近扑錘　免費簽AC米蘭大將

最強博彩盤路過關神器《串績王》：http://win.on.cc/football/　

干地重返英超執教熱刺，據報獲呢支倫敦勁旅答應有充足資源增兵，據意大利媒體《CalcioMercato》報道，干地第1簽已經接近「扑錘」，將會喺明年簽入回復自由身嘅AC米蘭中場基斯爾，16.5萬鎊周薪合約已經幾乎傾掂。

熱刺自意大利總監柏拉迪斯今夏上場後，球隊已經明顯「意甲化」，干地執教更加係明顯例子，除基斯甸羅美路、高連尼等意甲兵今夏加盟外，據報柏拉迪斯早已向AC米蘭中場基斯爾埋手，同呢位24歲中場嘅經理人艾坦加拿一直聯繫。《CalcioMercato》最新報道指，雙方已就16.5萬鎊周薪達成共識，只要艾坦加拿拎到佢嘅「上限佣金」，轉會就水到渠成。

科特迪瓦中場基斯爾同AC米蘭合約到季尾完結，佢明年1月就可以同其他球會簽署合約，熱刺領隊干地對基斯爾亦非常欣賞，如果轉會落實，將會成為干地重建嘅重要棋子。