楚原逝世︳演而優則導 拍《卡拉屋企》成TVB「新人甘草」 同劇拍檔粒粒巨星

名導演楚原昨日逝世，享壽87歲。楚原叔50年代起參與電影編劇導演工作，由黑白片拍到彩色，男女主角由謝賢嘉玲到周潤發周星馳梅艷芳。八九十後對楚原叔嘅印象，反而係佢嘅電視劇演出。

曾經演出電影嘅楚原，1991年先至首次拍劇，喺TVB處境劇《卡拉屋企》飾演退休警察黃家景，劇中被家人稱為白頭佬，性格樂觀但有時貪小便宜。雖然係第一次拍劇，但根據《卡拉屋企》監製之一潘嘉德憶述，楚原叔會帶領同劇演員按照劇本及角色創作演繹方式，可以話係將本身嘅導演技巧帶入劇組。《卡拉屋企》本身觀眾反應唔錯，後來監製由梁家樹轉為潘嘉德之後，風格變得更自由，睇到有唔少演員嘅即興演出痕跡，亦進一步推高收視。

《卡》之後，楚原參演大量TVB劇，另一個經典角色係《真情》嘅「歸齡高」，亦係出自處境劇。歸齡高係大馬拿督，女兒歸亞美（May May，馬蹄露飾）刁蠻任性無禮貌，結果被奸角子浩（鄭子誠飾）騙感情騙財，May May為挽留子浩而「食泥」甚至跳樓嘅集數，收視創出最高43點，以處境劇計可謂數一數二。而May May同歸齡高一齊打機但係無插遊戲帶呢幕，亦廣被網友cap圖流傳。

楚原叔嘅同劇拍檔而家有唔少都成為天王巨星，佢第二套劇《大頭綠衣鬥殭屍》就係由鄭秀文做女主角；《婚姻物語》入面有鄭伊健同埋仲未曬黑嘅古天樂。連較少人提起嘅《前世冤家》都出咗一位古巨基！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！