冇榨粉嘅榨粉街

广西除咗螺蛳粉，仲有种粉好出名，叫榨粉。有外地嘅朋友来广州，我介绍佢试榨粉，佢觉得好出奇：榨粉系广西嘅美食，来广州食榨粉咪好傻？我话，广州本身就有榨粉，不如试下广州嘅榨粉同广西有乜嘢唔同。广州不但有榨粉，仲有榨粉街添，广州第一所私人公共图书馆就喺呢度诞生，不过呢条榨粉街依家得个名，冇榨粉卖了。

广州曾经有一副以街名串成嘅对联，包括玉子巷、卖麻街、板箱巷、新桥市、黄婆栏、榨粉街、担杆巷、后楼房街。如今好多街巷已经消失，比如大新路嘅玉子巷变成市三中嘅运动场，板箱巷民国时被改造成为海珠中路，黄婆栏一早已经消失。但中山四路嘅“榨粉街”保留至今。

榨粉街系因为清代时期呢度有多间榨粉店而得名，将粉团压成一条条等揼入滚水，就变成“榨粉”了。榨粉街曾有好多历史建筑，比如榨粉街93号，系清末教育家、诗人梁鼎芬创建嘅广州第一间私立公共图书馆，仲有各类姓氏书院。呢条街只得300几米长，宽约5米，依家一早已经冇榨粉卖，两边开满生果店、糕点铺、杂货铺以及蔬菜摊，吃嘅、着嘅、用嘅咩都有，市井生活气息浓厚，同曾经嘅书香气息大相径庭。虽然食唔到榨粉，但系来呢度逛下，睇下广州本地街坊嘅生活原貌，都几唔错。