秋生笑指梁思浩 買棺材有八折

杜汶澤口沒遮攔激嬲容祖兒，梁思浩出言諷他「買棺材唔知碇」。黃秋生、黎芷珊昨日錄影清談節目《燭光晚餐》時，對於思浩的言論笑謂：「呢個友仔都幾好笑，古靈精怪，搵佢買（棺材）咪實知碇。佢成日拍埋啲神神化化嘢，梗係搵佢問啦，佢買有八折，仲包埋化粧、送埋衣紙。（係咪想話佢知碇？）講笑啫。」但對於阿澤的言論，秋生卻不予置評，還說：「之前已經講咗The End，唔再講啦。」

早前有傳無綫想安排黃翠如接受秋生訪問，但遭到拒絕，秋生對此直認不諱：「一個鐘頭講『翠如BB』點嚟？三分鐘講完啦，（你唔喜歡翠如BB？）點會唔鍾意，不過我真係唔識人哋。（有興趣搵契女梁洛施上節目嗎？）唔會啦，嘉賓名單一早定晒。」昨日嘉賓是張天愛和劉天蘭，秋生指兩位嘉賓有教養兼且功力深厚，令他唔敢亂講嘢。

採訪：Pauline

攝影：林良明