獨家丨吳若希分享馭夫心得 稱若有女人做第三者會讚賞對方

將會喺16號播出嘅一集《香港婚後事》，邀請到 吳若希 Jinny 做嘉賓，佢同老公Alex當年奉子成婚，Jinny仲不時不忌諱咁投訴老公，又或者公審老公嘅壞習慣， 黎諾懿 就係睇中Jinny呢種敢言嘅性格而請佢上嚟做嘉賓。

Jinny話自己喺婚姻上屬於有睇法嘅一類人，更加會將大家收埋喺心入面唔敢講嘅嘢大膽講出嚟，Jinny仲話老爺奶奶鍾意自己嘅其中一個原因，就係可以幫佢哋教仔呀！

講到佢嘅馭夫必殺技，Jinny就話唔可以講係必殺技，佢只喺睇對住咩人而用咩方法。節目入面Jinny仲會同大家討論婚姻之中最常遇到嘅出軌問題，佢就話最重要都你要由自身做起，Jimmy話：「你應該要有你老公缺乏嗰樣嘢，令到佢心靈上覺得係需要呢個人，（令對方）覺得冇咗呢個人自己嘅人生係冇咗一忽，佢自然就唔敢去冒呢個險。」而同為主持嘅陳自瑤亦指如果另一半要出軌嘅話，即使係去個廁所都可以出軌，冇可能24小時mon實對方。

當諾懿問到Jinny如果真係有個女仔想介入做第三者，佢會點處理？Jinny即話自己會好欣賞個女仔：「因為佢明知吳若希咁惡，有咩都會拎出嚟講，佢都唔介意做第三者，佢唔介意畀人知佢做第三者嘅時間，咁我覺得佢係有膽量嘅！」事後Jinny再補充，佢同老公嘅信任度都幾高，好多時都係人哋踢爆佢老公講大話，但自己本身係好信任對方，好Let go由對方鍾意做咩就做咩。