搭運河觀光船欣賞城市美景就見得多，搭運河船掃垃圾又見過未？荷蘭阿姆斯特丹當地的一間機構「Plastic Whale」為咗保護河流清潔，就推出搭船新體驗—一邊觀光，一邊撈垃圾，極具意義！其實，有時大家去旅行玩得太興奮，都會不經意破壞環境生態。但只要你們願意從細節入手，旅行都一樣可以咁Green架！

出門前關掉所有電器

除了可預防電器短路所引致的火警之外，亦都可以省錢省電，自己得益之餘，仲為環保出一番力。事關插上電源的電器其實都係處於備用狀態，待機個陣電源一直使用。所以，大家離港旅遊前，記得要檢查清楚！

減少使用即棄用品

每次去旅行，都會唔經唔覺用咗好多即棄物。酒店的梳洗用品、旅客指南單張、外賣餐盒等等，多用更為環境帶來嚴重傷害！雖然物品免費任攞，不過拎之前都諗下究竟自己有冇需要。例如：旅客指南單張有時一個家庭攞一張已經足夠，咁就可以減少之後扔掉的數量。

少用交通工具

眾所周知，交通工具排放的廢氣係造成溫室效應主要成因之一。據悉，車輛每燃燒每公升汽油約可產生2.26公斤二氧化碳。所以，大家去旅行過陣不妨多行路或踩單車，咁樣除了可以沿途慢慢欣賞城市景觀外，仲可以減少碳排放，一舉兩得！

保護當地環境

對人要識得尊重，對大自然都係架！最基本就係唔好亂拋垃圾同騷擾野生動植物及原住民！仲有，夏日好多人去進行戶外活動，為防曬黑都會有兩手準備，塗上一層厚厚嘅太陽油。不過防晒霜內的化學物質就會融入水內剝奪珊瑚礁嘅養分，影響整個海洋生態，所以要揀Natural Friendly 的防曬液啦！

相片來源：Plastic Whale @facebook