《延禧攻略》熱潮席捲全城，「皇后」秦嵐與「瓔珞」吳謹言變話題人物外，男子組都好高質，有「乾隆」聶遠又有「富察傅恒」許凱，就連演御前侍衛「海蘭察」嘅王冠逸賣萌放笑彈都放出超強人氣，呢位新加坡型男顏值得、演得仲唱得，古裝之下副爆肌波地更加睇得，完全係潛力股，「股民」不妨了解多啲！
登入 瀏覽本網站，可獲取積分換領專屬優惠
點擊查看專屬優惠
必睇男神「硬件」
30歲嘅王冠逸身高1.78米，靚仔之餘身形均稱，膚色仲要白雪雪，平日於各大社交網平台出盡絕招冧粉絲。
最大方就係密密晒健身片及晒肌相，對鏡自拍Chok盡胸肌、二頭肌及六塊腹肌等與粉絲Say Hi。加埋抱愛貓互動及冧爆甜笑大頭照，養眼度真係唔講得笑！
王冠逸不時晒爆肌照，吸晴度勁高！
與愛貓Coconut互動，冧到粉絲都想化身喵星人。
入行多年 無諗過搞笑出位
王冠逸於《延禧攻略》與「明玉」姜梓新係鬥氣冤家，被封「大嘴猴CP」。
唔少觀眾都勁Like佢傻萌嘅場面，但原來佢本人就完全無諗過「只負責搞笑」都可以吸引大家，更自爆於角色加入個人風格，意外獲編劇私訊大讚！
唱得演得 精通四國語言
王冠逸19歲時於日本準備以男團成員身份出道，不過傳因公司力谷另一女歌手，最後無疾而終，當時佢捱過一段苦日子，更因經理人出錯而要於電視台下跪道歉，以免電視台封殺公司全部藝人，捱咗兩年離開當地，輾轉於新加坡、德國、泰國與香港等地拍劇拍戲，仲有旅遊節目，變成精通英、日、粵、普通話等多國語言嘅實力派！
曾露股與AV拍情慾戲
唔止拍古裝與愛情劇，王冠逸2015年作出從影以來最大挑戰，拍攝新加坡導演邱金海執導電影《無限春光27》。
與AV西野翔上演激烈情慾戲，大膽露股演出，雖然係處男露肉情色作，但即獲西野翔大讚專業！
佢近日頻頻分享拍劇近照，嚟緊原來演船長，制服誘惑呀喂！
遇伯樂秦嵐坦認想紅 結伴襲康城
多年來作為星馬地區男神代表嘅王冠逸2016年轉戰內地發展，被「富察皇后」秦嵐主理嘅經理人公司簽咗，工作不斷，佢曾透露喜歡王冠逸嘅原因，就係夠真：「他不說場面話，直接說他很想紅，想賺多點錢養家！」
二人多次合作及上節目，曾經傳出緋聞！
今年5月和秦嵐獲品牌邀請現身康城紅地氈，於社交網留言立志：「我下個目標就是帶我的作品到康城！」
自爆有腦瘤 動手術前喪母雙重打擊
王冠逸曾歷生關死劫，曾透露2016年是人生最難忘一年，當時發現腦部有類似血瘤，本來想去北京做手術，豈料媽媽過世，大受打擊下突然暴瘦，並為媽媽食素，過後完成手術再到北京發展，現時仍自言最掛心爸爸與妹妹。