轉眼又一年，很多人喜歡作年度檢討，阿Bob（林盛斌）去年亦是豐收年，電台、電視、電影、廣告、大大小小活動宴會的司儀，還舉辦首次的棟篤笑talk騷，加上自家開設製作及經理人公司做老闆，一人身兼數職的阿Bob，年賺過千萬，坐擁半億身家，完全冇難度。

由入行前出身自一個孭周身債的家庭，到今日居住月租十萬元的加多利山三千呎豪宅，與天王劉德華、天后陳慧琳為鄰，阿Bob自有他一套賺錢絕學。接財神迎好運之前，不妨讓阿Bob先醒你幾招！

黐實我財神Bob，猴年包你荷包脹卜卜！（設計對白）

阿Bob租住的加多利山apartment，月租十萬元，鄰居有劉德華和陳慧琳，非富則貴。

為家庭全力拼搏的阿Bob，目的只有一個，就是令家中的「四條Queen」——太太Pearl、大女菲菲、二女熹熹、細女機機，生活愉快。

吸引力法則

別以為阿Bob（林盛斌）只得把口，其實嬉皮笑臉的外表底下，有一套做人哲學，幾乎可以世界通行。從哪裏得來的領悟？他有兩本好書推介：「第一本《人性的弱點》，係我做sales時睇嘅，教你點去了解人性，書中有啲點子同橋，教你待人接物、點處事。另一本係三、四年前睇嘅《秘密》，裏面講嘅吸引力法則，要正面諗好嘅嘢，咁好嘅事自然吸引埋嚟。呢本書唔係我睇完先學佢嘅理論，而係我睇咗先發覺，原來我一直好似本書咁講去思維，好似我做電台DJ嗰陣，就已經諗點去主持一個電視清談節目呢？好多年之後，就出現咗《兄弟幫》，所以真係好神奇！」

阿Bob笑言可用兩句口訣，就足以歸納他的處世原則：「襟撈、願做、冇投訴，肯捱、肯搏、唔怕蝕底。」對於客戶要睇的是長遠關係，無需要凡事斤斤計較，「搏」除「搏盡」更有「賭博」成份。他舉例當初接拍《老表，你好嘢！》時，角色是搶人老婆的衰人，並為拍劇需要騰出三個月的檔期，冇得外面搵真銀，「好多嘢係估唔到嘅，如果冇當日肯蝕底少少，之後唔會有《老表2》、《My盛Lady》同埋《食為奴》等等等等啦！」

阿Bob的三位千金都希望爸爸抽多些時間陪玩，簡單如騎膊馬便是父女最愛的遊戲。