彭順 玩具狂迷
有「鬼才導演」之稱的彭順拍鬼片嚇你半死,但私底下他卻是一名大細路,平時愛收藏童年時代的舊玩具,「我喺泰國間屋,三層高,全部都擺晒我啲玩具,連飯枱我都擺到滿晒,哈哈。」今年八月,他索性玩大佢,以五位數字金額租下旺角一個約五百呎唐樓單位,建立「香港製造玩具迷你博物館」。展出早期在香港製造的玩具,諸如現在市值過萬的聰明笨伯與蝙蝠俠模型、電動人力車,及外銷從未在港發售的鐵皮機械人,逾千件珍藏場面壯觀。「大部分都係我喺網上同外國逐件逐件搵返嚟,全部都係心血,得來不易,與其收埋晒,不如攞出嚟同人分享,呢度有好多香港人嘅集體回憶。」
彭順講起玩具手舞足蹈,四十七歲依然一臉童真,他跟記者大玩童年跟弟弟玩過的雙人膠彈槍,「以前啲玩具勝在夠互動,同細佬咁樣都可以玩足一日。」
香港製造的蝙蝠俠和羅賓電單車模型是博物館鎮店之寶,價值超過一萬元,「最正係有埋個盒,極之新淨,非常珍貴。」
香港製造
甫踏進彭順的玩具博物館,逾千件玩具盡收眼底,生產年份由30年代橫跨至80年代,部分更是香港製造,件件珍品。
彭順表示構思開這間玩具博物館,是希望同香港人一起「分享」,「我咁多玩具,點都要租一個倉安置,但與其要啲玩具不見天日,不如開間博物館畀人睇吓。呢度有啲玩具早年喺香港製造,係我哋香港人嘅集體回憶。」
玩具博物館選址在旺角,彭順坦言貪其夠就腳,「旺角有好多不同種類嘅玩具舖,好多玩具迷聚集,博物館開咗幾個月,假日會有近百人上嚟參觀,閒日都有二三十人。」
香港製造的聰明笨伯線控石頭車,他過萬元買入,用膠箱封好展示,珍而重之。
人力車反映了昔日香港文化,彭順花上萬元買入這架香港製造的人力車玩具,「嗰陣喺尖沙咀碼頭、虎豹別墅出面,真係會見到人力車o架,但九十後年輕人應該對呢樣嘢好陌生。」
彭順愛收藏香港製造的玩具,博物館一角設置專區,各位六、七十後,落足眼力,有幾多是大家曾經擁有?
感動人力車
彭順表示開設玩具博物館後,認識不少玩具發燒友,「最感動係見過一個女人,揹住八十幾歲嘅阿媽上嚟。呢度係唐樓無電梯,我平時行上嚟都覺得辛苦,但佢一個女人揹住阿媽上四層樓梯,佢話想阿媽可以睇番佢以前玩過嘅玩具,真係好感動!」
最令彭順意想不到的,是遇上了他珍藏多年電動人力車的設計師,「架人力車是香港製造玩具的代表作之一,那位設計師年紀好大喇,佢嚟到話見番自己以前設計的玩具好感動,佢仲keep住份人力車設計草稿,我聽到不知幾興奮,佢話遲啲攞畀我睇,真係好期待。」
六十年代香港製造的洗衣機玩具在加拿大買入,約數百元。「當時嘅父母多數掛住返工,小朋友要自己煮飯,做家務,呢類玩具好受歡迎。」
人力車反映了昔日香港文化,彭順花上萬元買入這架香港製造的人力車玩具,「嗰陣喺尖沙咀碼頭、虎豹別墅出面,真係會見到人力車o架,但九十後年輕人應該對呢樣嘢好陌生。」
JEEG機械人是參照日本漫畫《磁力鐵甲人》喺香港製造,「那些年好多香港製造嘅玩具都係外銷o架,呢款香港無得賣,所以特別矜貴。」
七十年代,李小龍紅極一時,香港的玩具商也紛紛順應熱潮,推出一系列李小龍模型玩具。彭順找到這個拿着雙節棍的李小龍,在eBay有售價值港幣380元。他更upload上facebook分享。
世界尋寶
彭順愛收藏玩具,源於童年回憶,「細過好鍾意玩玩具,但係無錢買,有啲玩具又畀阿媽丟咗,大個出嚟做嘢之後,好想全部買番晒返嚟。」
他認為,收藏玩具的樂趣在於搜集過程,平時他會像留意股票行程一樣,(目及)實拍賣網站eBay外,每逢到外地公幹,有空餘時間便會到當地的玩具店尋寶,「有次去加拿大一間玩具店,發現佢哋個地庫存放了大量香港製造的舊玩具,我揀呀揀,一次過買咗九大箱,一個人搬返嚟香港,真係好開心。」
儲玩具除了要有金錢、時間和地方存放,彭順坦言更要講緣份。「買到以前玩過的玩具,有種失而復得的感覺,如果搵到新淨的,仲好似執到寶咁。見到啱心水的舊玩具一定要即買,因為當你錯過咗佢一次,就可能買唔番,所以就算幾萬蚊買一件,當年只值十幾蚊嘅玩具,我都覺得值得。」
別人眼中的舊玩具,在彭順的眼中件件都得來不易。