強積金轉年金唔單止係天方夜譚，直頭係打橫。點解可以幾日前講左，一下子又話係天方夜譚？
講前有無同業界傾過？官員又知唔知業界本身發展緊乜？
有無溝通㗎？唔好搵著一般市民來搞
羅局長早前無啦啦突然之間講話要求強積金供款人係65歲之後就將強積金轉入年金度，呢個講法唔單止嚇咗普羅大眾一條，引起各界KOL不停出片回應，我哋MPF醫務室都收到風喺強積金業界嘅反應亦都非常之巨大。
係今集我哋就會講一講羅局長嘅言論點樣打亂積金局同業界嘅產品部署，同埋如果真係喺65歲一到就要轉入年金，呢個係一個生死賭局，點解咁講大家繼續睇埋落去啦。
據我哋MPF醫務室聽返黎嘅資料，MPF業界人士，大家都俾呢個消息嚇咗一跳。因為直到羅局長嘅呢個消息傳出之前一刻，整個業界都同積金局MPFA緊密合作，準備出適合65歲後投資嘅基金。積金局仲剛剛出左新既基金分類問卷，徵求各供應商嘅意見。
呢個新聞一出，令到大家大亂陣腳，大家都諗做緊嘅新建議仲應唔應該唔繼續做呢？陰謀論d嘅從業員仲會覺得，呢個可能係羅局長嘅組合拳其中一照，背後可能仲有連環拳。究竟局長嘅言論係代表佢自己定係代表政府呢？羅局長同積金局有冇溝通過㗎呢？最後如果真係要強迫性轉晒入年金嘅話，係咪大家現在唔再需要發展適合退休嘅基金呢？
根據我哋所了解積金局想每個強積金計劃內都會包含到唔同種類既基金。一啲基金係做到抗通脹，一啲基金要做到隨年齡減低投資風險，好似DIS咁。
另外，最新最近業界人人都做緊既，就係會穩定派息既基金。依個構思好明顯係受到宏利，去年所出既派息基金所啟發。呢種基金嘅特色就係會穩定每月或每季派息，風險相對比較低，目標投資者就係65歲後嘅供款人。
強積金嘅供款，現在已超過一萬億，積金局咁做法原意就係想大家喺強積金度供左既錢，到左65歲後，強積金平台都會有適合嘅產品俾你去投資，供咗款嘅嗰舊錢就唔好離開強積金平台喇，只要轉入去呢啲風險相對比較低，會穩定派息嘅基金就可以。
退休後基金類別，一直都係近一兩年積金局同埋各個強積金供應商主要想發展嘅新產品。因為強積金至2000年開始，已經超過20年了，一開始嘅供款人，現在都差唔多夠時間退休啦，嗰舊錢係非常之大，如果一下子比舊錢離開咗強積金平台，供應商所收嘅管理費就會少咗，積金局都唔想自己所管轄嘅資產值會突然之間下跌好多，所以積金局同埋供應商，大家都目標相同，都想發展呢一類退休後基金，來維持返等供款人將夠錢繼續擺返喺強積金平台上。
羅局長放完風後，跟手施政報告都提到強積金變年金呢單野，根據施政報告有關呢方面的內容，係咁寫:「進一步探討如何更好鼓勵巿民將強積金一筆過資產轉化成退休後定期可領取的年金」好彩見唔到「強制」變年金，或者「自動」變年金，d咁的字眼，今次的用字係「鼓勵」，無局長講的咁嚇人，「鼓勵」人自己轉，唔係被迫，即係仲有得揀掛?!
年金明明打亂左積金局既部署，而且資產總值由強積金平台轉左去年金。但積金局主席對於施政報告的建議居然表示歡迎。MPFA本來想出D退休後基金，如果轉年金，MPFA可管既資產、權力範圍，都會因轉年金而減弱，自己管轄嘅資產少咗，牙力都少左。比人踐上心口，積金局咁都講歡迎，真係夠晒官腔啦。咁大舊資產去左年金度，年金公司又惡啲。
睇住人口老化，65歲以上的人愈來愈多，未來MPF既錢就會愈來愈少，而年金的錢就會愈來愈多。
業界好多人出黎持反對意見，好似香港投資基金公會行政總裁黃王慈明就話，市民退休後不同階段有不同的處理財富手法，宜有多渠道供他們選擇，不應局限必須採用年金模式。施政報告之後，財經事務及庫務局局長許正宇亦出來重申，不會強制，會研究如何鼓勵轉化。
之前我地都有條片同大家講過，年金係D短命的去補貼D長命的，而且如果大家的投資回報足夠高的話，計埋投資收益，買年金係回唔到本的。政府想鼓勵大家買年金，咁一定要有着數大家先會買。
首先，如果年金係咁好、咁筍的話，香港人咁醒目，啲數口咁精，實會有D機會主義者衝晒去買啦，仲洗人鼓勵咩。
如果當局真係想年金受歡迎啲，一係就提高每月的領取金額，最好就跟通脹掛勾，咁樣先止減少到後顧之憂。個金額足夠高，大家計得通條數，自然會吸引到人去買。但呢d保單精算計的數，唔係話加就加架嘛。而家買緊年金嘅總額都比當局初時預期嘅少，大家都知乜料啦。其實網上都有論文研究過年金，點解咁少人買。
買年金，係65歲一到就一下子轉入，係一個生死賭局。買年金唔單止考慮每個月有幾多錢收，仲有好多問題要考慮架。首先，我都想似條片都講過，如果你想要一大筆錢做到架野，好似想跟埋其他儲蓄，做投資，買樓，或環遊世界。買咗年金，就做唔到，呢d就係liquidity constraints，即係流動性約束。
而且無咗一大筆錢去周轉，有乜大病想要去睇好d的私家醫生都唔得。就算年金的未來現金流可以攞去抵押借錢，但當有病時，預期壽命就會縮短，年金的價值亦相應大幅下降，可以借到的錢就會下降，所以，當你最需要錢時，買咗年金，就有機會令自己陷入困境。
買唔買年金，除咗衡量埋自己的投資回報，都要估計下自己有幾長命。如果你投資回報好差，甚至蝕錢，咁可能你有年金的需求。
不過，都要估埋自己有幾長命先，如果身體已出現警號，可能得番十年八載，咁自然都唔會去買年金啦。
大家其實都好難估到自己會活幾耐，依家覺得無事無干，牛都打得死幾隻，覺得自己會好似羅局長所講長命百二歲，但唔好忘記呢個世界係有negative health shock，即係無啦啦大吉利事令一個人死亡。所以，愈早買年金的話，當一個negative health shock打埋黎，咁就後悔都黎唔切。
而且很多人都有下一代，想留番d遺產畀子孫。買唔買年金，都係大家理性的選擇，唔應該強制，咁硬黎囉。大家都識計數識諗，個計劃，個產品係好，夠吸引，人哋自然會識揀啦。
依家依一刻政府好似態度軟化咗，有機會唔強制。不過，咁多年之後的事，好難講。
如果真係喺65歲一到就即刻要將強積金轉入年金，喺呢個生死賭局，大家要點做？65歲前應該點步署?難道就唔洗理強積金? 咁又唔係，因為你管好你的強積金，只要65歲時的總金額愈高，你每月可以提取的金額就會愈多。
例如男士65歲時，如果你強積金內舊錢有100萬，你每月收取的年金5800元；如果係120萬元，那你每月收取係6960元；如果係150萬元，那你每月收取係8700元，相差都幾多下。
所以，如果係65歲被迫強制終止投資轉年金，要令到個一刻資產最大化的話，大家係將近65歲時就要非常小心，因為一轉左入去年金個一刻，就無仇報架啦，將來每個月攞幾錢，就好睇個一刻你的資產價值。如果唔好彩你65歲嗰年，剛好係環球大熊市，好似九七年，或零八年咁，咁你嘅資產值會大縮水，你就會用依個縮咗水嘅資產去計你個年金。
所以，轉年金前唔好take咁大risk，因為跌左追唔返。一個唔覺意，個市係計數前無啦啦跌一跌，如果跌咗20萬，咁每個月你會收到既年金就少咗1000幾蚊架啦。
不過，呢個都係強制轉年金先要考慮的事。依家，大家知道個遊戲係點玩就夠了，唔好一舊雲，連年金係點運作，着唔着數都唔知。
今日就講到呢度啦。我地下次見，byebye。
美股表現近年持續強勁，不知如何入手？我們精選了10隻高增長美股，並撰寫了《不應錯過的10隻高增長美股》免費報告。立即按此下載！
想提早退休? 想提高每月的被動收入?
我們撰寫的《必須收藏的收息股投資指南》電子書用實例教您挑選出真正可長期持續派息的收息股及揭示必要避開的收息「陷阱」。要知道打造穩健收息投資組合的竅訣，請立即按此免費下載！
本文所提供的信息僅供一般參考之用，並不構成任何個人化的投資勸誘或建議。作者沒持有以上提及的股票。
HK MoneyClub (www.hkmoneyclub.com)
