【真係咁好搵？】王祖藍郭政鴻作客《Mean傾》大爆北上掘金熱潮

近年越嚟越多本地藝人選擇北上搵真銀，唔少人都以為佢哋個個都會成為搶手貨、好吃香，其實好多時佢哋北上好好搵，其實真係有苦自己知，要有人賞識或要自己努力爭取機會，咁先有機會成為炙手可熱嘅藝人。Yahoo TV 自家製娛樂節目《Mean傾》第二季今集就邀請咗王祖藍同郭政鴻作客，解構吓娛樂圈北上掘金熱潮，究竟係唔係大家所諗嘅咁好搵呢？！

近年轉戰內地嘅郭政鴻主要以拍戲為主，而喺內地人氣高企嘅王祖藍就以拍綜藝節目為主。首先，主持人盧覓雪問佢哋北上掘金有咩得與失，郭政鴻就話搵食啫，如果喺無綫做慣一二線，一開始未必有得做一線，可能首先要客串下先，因為內地人對呢位藝人嘅認識未必好深，好多時要由頭開始。另外，郭政鴻亦話北上所搵到嘅錢唔會少過無綫，除咗錢之外，佢仲多咗時間陪屋企人，不過犧牲嘅就係曝光率會減少。

而早年已經北上發展嘅王祖藍，可以話係人生勝利組。王祖藍話佢可以成功北上發展主要係同《福祿壽》有關，因為以往內地嘅綜藝節目較為老派（相聲、小品及二人轉等等），剛巧內地有人想開一個模仿節目，而當時正正有《福祿壽》，之後有人推薦佢俾而家《我是歌手》導演洪濤，洪濤就去無綫同王祖藍傾。當時王祖藍都係諗住試下，如果做得唔好就返無綫繼續做。王祖藍仲話去之前係搵佢客串一集，點知佢客串完一行出去，一班高層喺隔離房睇實佢，原來當日係考緊牌。

另外，佢哋仲有傾吓喺應酬上嘅趣事，郭政鴻就話佢有一個好得意嘅趣事就係關於一個商業嘅演出，主辦方用咗好多方法叫佢去，去到原來係嗰個人嘅媽媽生日，俾人拉咗去賀壽。

王祖藍就認為內地人一代比一代進步，因為佢之前同仲係女朋友嘅李亞男去澳州，有一個內地移民由頭跟到尾，期間不停影相，之後王祖藍就同佢講：「對不起，可以不用再拍嗎？」之後，嗰個內地移民就話自己係老澳州，我唔知你係邊個，你有咩咁了不起啊！之後呢個內地移民個女行過去同返祖藍道歉。

王祖藍之後仲分享咗一個趣怪經歷，就係佢去派電影海報，之後好多埋去拎，其中有個人就係咁話好鍾意佢。不過佢下面有一個小妹妹，所以祖藍就將海報派俾個小妹妹，但係呢個人就係咁搶嗰張海報，祖藍叫佢放手俾小朋友。之後，呢個人就講粗口鬧返轉頭。